Carchar i ddyn o Wrecsam am drais yn erbyn ei gymar

Mae dyn 22 oed wedi ei garcharu am drais yn erbyn ei gymar.

Mi ymddangosodd Fletcher Wright, o Ffordd Benjamin, Wrecsam gerbron Llys y Goron, yr Wyddgrug i’w ddedfrydu heddiw (dydd Mercher, 6 Tachwedd), wedi iddo gyfaddef ymddygiad rheolaethol a gorfodol, tagu nad yw’n angheuol a bygwth tyst.

Mi gafodd ei garcharu am dair blynedd, ac mi dderbyniodd orchymyn atal penagored, er mwyn gwarchod y dioddefwr.

Tra ar fechnïaeth yr heddlu efo amodau i beidio mynd ar gyfyl na chysylltu â’r dioddefwr yn dilyn digwyddiad gafodd ei riportio i’r heddlu ym mis Ionawr, mi barhaodd ei ymddygiad rheolaethol a gorfodol, a thrais corfforol, tra hefyd yn bygwth difrodi ei heiddo.

Yn dilyn datgeliadau pellach gan y dioddefwr i’r heddlu ym mis Ebrill, mi gafodd Wright ei gyhuddo eto a’i remandio i’r ddalfa.

Dywedodd y swyddog ymchwilio, y Ditectif Gwnstabl Jessica Rowley: “Gallai cam-drin domestig ymddangos mewn sawl ffurf a chael effaith ddwys a pharhaol ar unigolyn.

“Mi arddangosodd Fletcher batrwm parhaus o ymddygiad rheolaethol drwy gydol y berthynas, gan ddefnyddio trais i beri ofn i’r dioddefwr.

“Mi geisiodd barhau efo’r ymddygiad hwnnw drwy gydol yr ymchwiliad, er mwyn ceisio atal y dioddefwr rhag cael cymorth.

“Mae Fletcher wedi diystyru’r  system cyfiawnder troseddol yn llwyr, ac mae’n peri perygl i ferched.

“’Dydy o ddim yn hawdd riportio digwyddiadau o'r fath, a ‘dwi’n cymeradwyo dewrder y dioddefwr am leisio ac am gynorthwyo’r ymchwiliad.

“Mi fuaswn yn argymell yn gryf bod pobl yn gwneud cais i’r Cynllun Datgeliadau Cam-Drin Domestig (DVDS) wrth ddechrau perthynas newydd.

“’Da ni’n parhau gweithredu ar unrhyw hysbysiad o bob math o drais yn erbyn merched, ac mi wnawn ni barhau yn ein hymdrechion i ddod â troseddwyr cam-drin domestig o flaen eu gwell.”