Mae dyn wedi’i arestio yn dilyn digwyddiad yng Nghricieth

Mae dyn wedi’i arestio yn dilyn digwyddiad yng Nghricieth y prynhawn yma.

Mi ddaeth swyddogion yn ymwybodol o bryderon lleol ynglŷn â dyn o dan amheuaeth o gario arf yn ardaloedd Llanystumdwy a Chricieth toc cyn 2pm heddiw, dydd Mawrth 19 Tachwedd.

Yn dilyn ymholiadau, mi gafodd dyn lleol 36 oed ei adnabod, a’i arestio o dan amheuaeth o droseddau yn erbyn y drefn gyhoeddus. Nid oedd arf yn ei feddiant.

Dywedodd yr Arolygydd Jamie Owens: “Mi hoffwn dawelu meddwl y gymuned bod hwn yn ddigwyddiad unigol a ‘does dim pryderon parhaus.

“Nid oedd arfau wedi’u canfod, ac mae’r dyn yn parhau’n y ddalfa tra bod ymholiadau’n parhau.”

Dylai unrhyw un efo mwy o wybodaeth ynglŷn â’r digwyddiad gysylltu efo ni drwy ein gwefan, neu drwy ffonio’r heddlu, gan ddefnyddio’r cyfeirnod Q174601.