Ymgyrch traws-ffin ar y cyd yn targedu trosedd difrifol a threfnedig yn Sir y Fflint a Swydd Gaer

 

Mi ymunodd Heddlu Gogledd Cymru â Heddlu Swydd Gaer ddoe, er mwyn mynd i’r afael â throseddoldeb ar draws y ddwy ardal.

Ar ddydd Iau, 28 Tachwedd, mi gymerodd swyddogion o Dîm Plismona Gogledd Sir y Fflint ran mewn ymgyrch efo swyddogion o Gaer a Swydd Caer, efo’r nod o dargedu trosedd difrifol a threfnedig dros y ffin rhwng y ddwy sir.

Mi wnaeth yr ymgyrch ganiatáu i bartneriaid o sawl sefydliad weithio ar y cyd, er mwyn trechu a tharfu ar droseddoldeb, gan gynnwys y rhai sy’n teithio rhwng Sir y Fflint a Chaer, tra’n darparu presenoldeb er mwyn tawelu meddwl y cyhoedd a pherchnogion busnesau.

Mi wnaeth y gweithgareddau ar draws y ddwy ardal gynnwys:

• Naw arestiad yn Sir y Fflint am amrywiaeth o droseddau.
• Mi ‘roedd Tîm Troseddau’r Ffyrdd ar gael ar y ffin, yn targedu troseddwyr traws-ffiniol, lle wnaethon nhw stopio dros 60 o gerbydau.
• Patrolau amlwg iawn, efo nifer o stopio a chwilio yn cael eu cyflawni yn eu sgil.
• Mi ‘roedd ci cyffuriau ar waith ynghanol dinas Caer, gan gynnwys yng Ngorsaf Drenau Caer.
• Mi ‘roedd y drôn allan ar draws Sir y Fflint.
• Mi ymwelodd y tîm Safonau Masnach â siopau yng Nghaer, gan ddefnyddio ci chwilio arbenigol o’r tîm Safonau Masnach er mwyn chwilio am sigaréts anghyfreithlon.
• Mi ‘roedd y fan Strydoedd Diogelach a’r Tîm Troseddau Seiber yng Nghaer ar gyfer rhoi cyngor diogelwch ac atal trosedd.
• Mi ‘roedd Tîm Troseddau Cefn Gwlad Heddlu Gogledd Cymru allan efo’u cymheiriaid o Heddlu Swydd Gaer.
• Mi gyflawnwyd ymweliadau trwyddedu ledled Sir y Fflint a Swydd Caer er mwyn sicrhau bod tafarndai’n cydymffurfio efo amodau’u trwyddedau.
• Mi wiriwyd trwyddedau tacsis, mewn partneriaeth â Chyngor Gorllewin Swydd Gaer a Chaer, drwy stopio tacsis er mwyn sicrhau eu bod yn cydymffurfio â rheoliadau.
• Mi wnaeth Uned Tanddwr y Gogledd-Orllewin chwilio’r gamlas yn Garden Lane am unrhyw eitemau anghyfreithlon wedi’u gollwng i’r gamlas. Bu patrôl o’r gamlas hefyd, er mwyn tawelu meddwl ac atal unrhyw droseddoldeb.

Yn ystod y diwrnod, rhwng y ddau heddlu, mi ‘roedd 12 arestiad, 22 stopio a chwilio, dros 60 cerbyd wedi’u stopio, a swm sylweddol o sigaréts a fêps wedi’i hatafaelu.

Mi ‘roedd hefyd chwech arést yn ymwneud â mewnfudo, pump cerbyd wedi’u hatafaelu, a chwech Hysbysiad Troseddau’r Ffyrdd.

Dywedodd Arolygydd Gogledd Sir y Fflint, Wes Williams: “Mae Ymgyrch Liberator wedi’i lansio er mwyn mynd i’r afael â throseddau difrifol a threfnedig ar draws Gogledd Cymru a Swydd Gaer, lle ‘da ni’n gweithio efo partneriaid fel timau Mewnfudo, Safonau Masnach a Thrwyddedu.

“Bwriad y diwrnod oedd rhoi gwybod i’r cyhoedd ein bod yma, ein bod ar gael, ac mi wnawn ni barhau efo rhedeg yr ymgyrchoedd hyn yn reolaidd er mwyn sicrhau ein bod yn cynorthwyo ein cymunedau.

“’Da ni’n annog ein trigolion i barhau i roi gwybod i ni am bryderon yn eu hardal, sy’n ein galluogi ni i weithredu ar gudd-wybodaeth er mwyn gwneud Gogledd Sir y Fflint yn lle diogel i fyw, gweithio ac ymweld.”

Dywedodd Arolygydd Uned Plismona Lleol Caer, Heddlu Swydd Gaer, James Wilson: “Mae ymgyrch heddiw wedi bod yn llwyddiant mawr, efo nifer o arestiadau, stopio a chwilio ac atafaeliadau.

“Drwy gydol y diwrnod, mi ddefnyddiom ni ystod eang o dactegau er mwyn tarfu ar droseddoldeb yn Swydd Caer, ond mae’n bwysig nodi ein bod ni’n defnyddio’r rhain yn rheolaidd yn ein tactegau plismona dyddiol.

“Wrth symud ymlaen, mi fydd yr ymgyrchoedd rheolaidd hyn yn gyfle gwych er mwyn amlygu ein bod yn gweithio’n agos efo’n cydweithwyr traws-ffiniol yng Ngogledd Cymru, yn ogystal â’n partneriaid yma yn Swydd Gaer.

“’Da ni wedi dangos ein bod yn ymrwymo i wneud pob dim posib er mwyn trechu ymddygiad troseddol wyneb yn wyneb, a sicrhau bod ffin Swydd Caer / Gogledd Cymru yn parhau i fod yn lle digroeso i droseddwyr.”