Apêl am wybodaeth yn dilyn lladrad yng Nghoedpoeth

Mae ymchwiliad wedi’i lansio ynglŷn â lladrad yng Nghoedpoeth.

Am 9.41am heddiw (dydd Mercher, 13 Tachwedd), mi dderbyniom hysbysiad bod dau unigolyn o dan amheuaeth wedi mynd i fferyllfa ar y Stryd Fawr, ac wedi mynnu arian o’r til, cyn dianc ar droed.

Mi gredir eu bod wedi rhedeg i fyny Gallt Tabor, a throi i’r dde tuag at Neuadd y Plwyf.

Mae chwiliadau i’w canfod ar y gweill.

Dywedodd y Ditectif Arolygydd Claire Roberts: “’Da ni’n dilyn nifer o ymholiadau fel mae’n hymchwiliad i’r digwyddiad, a’n hymdrechion i ddarganfod y rhai o dan amheuaeth, yn parhau.

“Mi hoffwn i dawelu meddwl y gymuned bod digwyddiadau o'r fath yn anghyffredin yn Wrecsam, a ‘da ni’n deall nad oes bygythiad ehangach i’r gymuned.

“’Dwi’n ddiolchgar i’r rhai sydd eisoes wedi rhoi gwybodaeth i ni, sydd wedi ein helpu ni efo’n ymholiadau.

“’Dwi rŵan yn gofyn i unrhyw un efo gwybodaeth neu unrhyw un efo camerâu TCC neu fideo camera cerbyd yn ardal y Stryd Fawr, Gallt Tabor, neu Ffordd y Parc, i gysylltu efo ni drwy ein gwefan, neu drwy ffonio 101, gan ddefnyddio’r cyfeirnod Q171369.

“Gallwch hefyd gysylltu’r elusen annibynnol CrimeStoppers yn ddienw ar 0800 555 111.”