Wythnos Plismona Ymateb – Cwnstabl Llinos Hughes

Mae Wythnos Plismona Ymateb yn gyfle gwych i ni rannu straeon oddi wrth ein swyddogion ar y rheng flaen, am eu gyrfaoedd a be’ maen nhw’n ei wneud. Yn gyntaf,  dyma Cwnstabl Llinos Hughes sy’n gweithio yng Ngorsaf Heddlu Rhuthun.

“‘Dwi wedi bod yn swyddog heddlu ers 10 mlynedd a hanner, ac wedi gweithio ar y tîm ymateb drwy gydol fy ngyrfa, heblaw am gyfnod pan ‘roeddwn i ar ddyletswyddau cyfyngedig ar ôl dioddef ymosodiad treisgar yn 2019.

Mi gychwynnais fy ngyrfa yng Nghanolfan Cyfathrebiadau’r Heddlu, wedyn mi wnes i ymuno fel SCCH. I mi, ‘roedd yn ddatblygiad naturiol i  ymuno fel swyddog heddlu. ‘Dwi wrth fy modd ar y tîm ymateb, mae wrth galon plismona. ‘Dwi wrth fy modd efo amrywiaeth y digwyddiadau ac yn medru cyfarfod â phobl newydd bob dydd.

Hoffwn feddwl fy mod yn gallu gwneud gwahaniaeth i rywun; efallai bod hynny’n ordeimladol, ond mae’n wir. Efallai fy mod yn cyfarfod rhywun pan maen nhw ar eu mwyaf bregus pan maen nhw angen help, a ‘dwi wastad yn delio efo nhw fel  baswn i eisiau cael fy nhrin neu fel baswn i eisiau aelodau fy nheulu gael eu trin.

 

Yn ddiweddar, es i i fyrgleriaeth  ddwys. ‘Roedd y teulu yn cysgu yn eu cartref pan gafodd ei ysbeilio’n llwyr. ‘Doedden nhw heb ymdrin â’r heddlu erioed o’r blaen, felly mi wnes yn siŵr fy mod yn eu cynorthwyo’n llwyr trwy gydol yr ymchwiliad. Mi gadwais mewn cysylltiad efo nhw am amser hir ac mi ‘roedden nhw’n werthfawrogol iawn o hyn. ‘Roeddwn i’n teimlo fy mod wedi gwneud gwahaniaeth yn eu bywydau yn dilyn profiad trawmatig.

‘Da chi’n ran o deulu pan ‘da chi’n gweithio ar dîm ymateb. ‘Da ni’n gweithio mor agos efo’n cydweithwyr ar rota, mae’n bwysig medru ymddiried ynddyn nhw ac i weithio fel tîm.

 

Y peth mwyaf heriol ydy cadw ar ben yr holl ddigwyddiadau y mae’n rhaid i  ni eu mynychu efo nifer  prin o staff. Mae’r nifer o wahanol ddigwyddiadau ‘da ni’n ymateb iddyn nhw yn medru bod yn daith wib ar brydiau. Yn gweithio mewn ardal cefn gwlad, mae’n rhaid meddwl am pa mor bell i ffwrdd mae’ch cydweithwyr ac i blismona mewn ffordd mwy clyfar.

‘Da chi’n darllen rhai pethau negyddol am y swydd ar y funud, ond ‘dwi’n meddwl ei bod hi i fyny i chi i wneud y gorau ohoni . ‘Dwi’n meddwl mai hon ydy’r swydd mwyaf gwerth chweil.”

 

Gallwch chi fod yn swyddog rheng flaen fel Llinos? Mae ein ffenest recriwtio ar agor! Cliciwch yma i wneud cais – Police Constable 2024 E - Police Jobs Wales (tal.net)