Dyn wedi’i garcharu ar ôl cynnau tân yn ei dŷ ei hun, ac yna’i adael

Mae dyn 51 oed wedi ei garcharu ar ôl cynnau tan yn ei gartref ei hun, ac yna’i adael.

Ymddangosodd Marcus Rahilly, o Green Terrace, Trefor, yn Llys y Goron, Yr Wyddgrug heddiw, dydd Llun 17 Mehefin, ar ôl ei ganfod yn euog o gynnau tân bwriadol, efo’r bwriad o beryglu bywyd.

Toc ar ôl 3am ar 11 Hydref, 2023, mi gafodd y gwasanaethau brys eu galw i dân mewn cartref yn Green Terrace yn Nhrefor.

‘Roedd Rahilly, oedd yn denant yn yr eiddo cymdeithas dai, wedi cynnau tân ar ddillad yn yr ystafell wely cyn gadel yr adeilad.

Llai na dau funud yn ddiweddarach, dechreuodd y larwm tân. Clywodd cymydog y larwm, ac aeth i fewn i’r adeilad i ganfod y tân yn lledaenu.

Mi wnaeth hi gysylltu efo’r gwasanaeth tân yn gyflym, ac ‘roedden nhw’n medru dod â’r tân o dan reolaeth, a’i atal rhag lledaenu drwy’r rhes o dai cyfan, gan ddiogelu’r preswylwyr eraill.

Mi gafodd ei garcharu am dair mlynedd a chwe mis.

Dywedodd y Ditectif Ringyll Jamie Atkinson: “’Roedd hwn yn ddigwyddiad byrbwyll a pheryglus, lle cafodd dân bwriadol ei gynnau ynghanol rhes o dai.

“Oni bai am ddewrder a gweithrediadau cyflym cymydog cyfagos, buasai rhywun wedi’u niweidio.

“Pe bai’r tân wedi cael ei adael yn hirach, buasai’r canlyniad wedi bod yn llawer mwy difrifol.”