Heddlu Gogledd Cymru yn rhyfeddu torfeydd yn y Diwrnod Agored

Nododd Heddlu Gogledd Cymru ei ben-blwydd yn 50 oed drwy groesawu ymwelwyr i'w bencadlys ar gyfer Diwrnod Agored yr heddlu dros y penwythnos.

Daeth bron i 4,000 o ymwelwyr, a oedd yn cynnwys arddangosfeydd gan Uned Drylliau Tanio a chŵn yr Heddlu ac arddangosfa trefn gyhoeddus yn cynnwys tân.

Wedi'i gynnal ddiwethaf yn 2017, mae'r Diwrnod Agored sydd am ddim yn parhau bod yn achlysur hynod boblogaidd hefo pobl o bob oed.

Wedi'i gynnal ym Mhencadlys yr Heddlu ar ddydd Sadwrn 14 Medi, disgleiriodd yr haul ar ddiwrnod llawn gweithgareddau a oedd yn nodi pen-blwydd yr heddlu yn 50 oed. Cafodd ymwelwyr gyfle cwrdd hefo swyddogion a staff o amrywiaeth o dimau ac adrannau er mwyn dysgu mwy am blismona yng Ngogledd Cymru.

Cynhaliwyd amserlen lawn o ddigwyddiadau ac arddangosfeydd trwy gydol y dydd, gan gynnwys arddangosiadau byw gan yr Uned Drylliau Tanio a Chŵn ar y Cyd, efelychiadau Trefn Cyhoeddus byw ac ymweliad gan hofrennydd yr heddlu.

Ochr yn ochr â'r llu o arddangosfeydd a stondinau, allfeydd bwyd ac elusennau lleol, cafwyd sgyrsiau yn trafod pynciau fel camfanteisio ar blant a chyfle i ddysgu mwy am ateb galwadau 999 a sut y gall gyrru'n fwy saff achub bywydau.

Roedd sawl stondin ac arddangosfa hefyd yn cynnig cyngor atal troseddau yn ogystal â stondinau gan ein partneriaid gan gynnwys y Tîm Achub Mynydd, Gwylwyr y Glannau, y Bad Achub a Beiciau Iechyd Meddwl.

Roedd ceir heddlu hanesyddol yn cael eu harddangos ac roedd trelar arddangosfa Police Car UK yn rhoi cyfle i bobl ddysgu mwy am gerbydau'r heddlu a sut maen nhw wedi newid dros y blynyddoedd.

Roedd ymwelwyr hefyd yn gallu galw heibio amgueddfa dros dro'r heddlu, a oedd yn arddangos y newidiadau mawr sydd wedi digwydd ers i Heddlu Gogledd Cymru gael ei sefydlu yn 1974. Roedd yr arddangosfa'n cynnwys offer hanesyddol yr heddlu, hen lifrai, ffotograffau a darnau o bapurau newydd o orffennol yr heddlu.

Roedd y Prif Gwnstabl Amanda Blakeman wrth ei bodd hefo'r diwrnod. Dywedodd: "Dwi'n falch iawn o ddweud bod y Diwrnod Agored wedi bod yn ddigwyddiad gwych.

"Hefo cymaint o bobl yn bresennol, rhoddodd y cyfle delfrydol i'n swyddogion a'n staff ni sgwrsio hefo'r cymunedau 'da ni'n falch o'u gwasanaethu nhw.

“Wrth i ni fel heddlu ddathlu ein pen-blwydd yn 50 oed,^⁠ roedd y diwrnod hefyd yn rhoi cipolwg go iawn i'r cyhoedd ar y sgiliau a'r arbenigeddau amrywiol sy'n bodoli o fewn Heddlu Gogledd Cymru a'n hasiantaethau partner.  

"Mi fuaswn i'n hoffi diolch i bawb sy'n ymwneud hefo trefnu a chyflwyno'r Diwrnod Agored a chanmol eu gwaith caled nhw i'w wneud yn achlysur diogel a chofiadwy i'r rhai a ddaeth draw."

Er mwyn gweld rhai o'r lluniau o'r Diwrnod Agored ewch draw i'n tudalennau Facebook neu Instagram.

Nodiadau:

• Dewch i wybod mwy am gerbydau heddlu hanesyddol drwy: Police Car UK – Ceir clasurol, ceir heddlu