Carcharu dyn ar ôl ymosod ar ddynes oedrannus wrth iddi gysgu

Mae dyn a dorrodd mewn i gartref dynes oedrannus tra roedd hi'n cysgu ac ymosod arni wedi cael ei garcharu.

Toc ar ôl 9pm ar 24 Mawrth llynedd, aeth Carl John Reed i gartref dynes 72 oed a oedd yn byw ar ei phen ei hun yng Nghaergybi.

Cafodd y ddynes ei deffro gan sŵn yn ei thŷ ac yna teimlodd fod rhywun yn ei hystafell wely. Trodd a gweld Reed ar ei gwrcwd yn ei hwyneb hi.  Yn sydyn fe wnaeth ei dal i lawr ar ei gwely gan ddefnyddio ei freichiau, gan ofyn am arian ac yn bygwth ei "thrywanu" hi.

Parhaodd y dyn 52 oed hefo'i ymosodiad, gan ddyrnu'r ddynes yn ei hwyneb, ei phen a'i gwefus gan achosi i'w cheg waedu.

Ceisiodd y ddynes egluro nad oedd ganddi arian, ond parhaodd Reed ymosod arni gan fynnu ei bod yn trosglwyddo'r arian.

Pan aeth Reed i ystafell wely arall yn y tŷ, rhedodd y dioddefwr yn gyflym allan o'i thŷ i'r stryd gan weiddi am help.

Sylwodd bod drws cymydog ychydig yn agored a rhedodd i'w cartref lle dywedodd wrthyn nhw beth oedd wedi digwydd a ffonio'r heddlu.

Gwnaeth ymchwiliadau fforensig ganfod DNA Reed ar eitemau o amgylch cartref y dioddefwr, gan gynnwys trosol du a dwy faneg dafladwy las a oedd hefyd yn cynnwys gwaed y dioddefwr ei hun.

Yn ogystal â hyn, cafwyd hyd i farc esgidiau yng nghartref y dioddefwr a oedd yn cyfateb i'r un esgidiau hyfforddi y gwelwyd Reed yn eu gwisgo ar gamera cylch cyfyng oriau yn unig cyn y digwyddiad.

Ymddangosodd Reed, o ddim cartref sefydlog ger bron Llys y Goron Caernarfon heddiw, dydd Mawrth 24 Medi ar ôl cyfaddef i ymosod ar ddynes hefo'r bwriad o gyflawni lladrad.

Mi gafodd ei garcharu am 10 mlynedd, hefo cyfnod estynedig o 4 blynedd.

Dywedodd y Ditectif Gwnstabl Leslie Ellis: "Mae gan bawb yr hawl teimlo'n saff yn eu cartref nhw.

"Roedd hwn yn brofiad trawmatig i'r dioddefwr, a gafodd ei churo'n dreisgar wrth iddi gysgu yn ei gwely.

"Roedd y dioddefwr yn aelod poblogaidd o'i chymuned, a wasanaethodd yn ddewr fel nyrs am dros 30 mlynedd cyn ymddeol. Roedd hi'n hwyliog hefo personoliaeth fyrlymus ac roedd ganddi awch am fywyd. Ond ers y digwyddiad mae'n dioddef hefo'i hiechyd yn sylweddol o hyd.

"Roedd gweithrediadau Carl Reed yn ddirfawr ac ni ellir eu tanbrisio. Mae wedi cael effaith ddinistriol ar ei bywyd.

"Er na fydd unrhyw ddedfryd yn adlewyrchu'r trawma parhaol a brofwyd gan y dioddefwr, dwi'n canmol ei dewrder drwy gydol yr ymchwiliad.

"Hoffwn ddiolch hefyd i gymuned Caergybi am eu help sydd wedi helpu dwyn Carl Reed o flaen ei well."