Bwrdd Moeseg

Mae'r Bwrdd Moeseg sy'n cael ei gadeirio yn annibynnol wedi ei sefydlu i wella ymddiriedaeth a hyder ym maes llywodraeth foesegol a gweithredoedd Heddlu Gogledd Cymru a Swyddfa Comisiynydd Heddlu a Throsedd.

Yn sylfaenol bydd y bwrdd yn gweithredu fel fforwm ar gyfer adolygiad annibynnol o faterion moesegol yn yr heddlu.

Bydd ei harweiniad yn helpu hysbysu gwaith Heddlu Gogledd Cymru a’r Comisiynydd Heddlu a Throsedd a bydd yn rhoi sicrwydd ychwanegol i'r cyhoedd.

Bydd panel y Bwrdd yn edrych ar faterion moesegol o fewn yr heddlu ac yn hyrwyddo gweithio tryloyw ac arfer da ar draws yr heddlu.

Ei nod fydd cynnwys yr holl rolau o fewn plismona ac ymgorffori gwaith swyddogion, staff a gwirfoddolwyr o fewn Heddlu Gogledd Cymru.

Fel rhan o'u rôl, bydd aelodau'r Bwrdd Moeseg yn:

• Ystyried dilemâu moesegol sydd wedi eu cyflwyno i'r bwrdd a gwneud argymhellion i'r Prif Swyddogion a'r CHTh.
• Adnabod materion moesegol sy'n codi o fewn yr heddlu ac yna gweithredu'n briodol wedi hynny.
• Hyrwyddo'r safonau uchaf ynghylch ymddygiad moesegol.
• Rhoi pwyslaid ar addysg i faterion moesegol.
• Bod yn ffynhonnell cymorth i fyrddau eraill a phob adran o'r heddlu ar faterion moesegol a sicrwydd moesegol.
• Sicrhau cydymffurfiaeth â gwerthoedd sefydliadol.
• Gan ddefnyddio
   Y Coleg Plismona  i gynorthwyo wrth wneud penderfyniadau.
• Darparu gwiriadau sicrwydd moesegol i bolisïau newydd a diwygiedig HGC.
• Rhoi sicrwydd moesegol a chysylltu hefo bwrdd diwylliant HGC.
• Nodi cyfleoedd dysgu a/neu newid gweithrediad a'i gysylltu gyda grwpiau priodol o fewn HGC.
• Cymryd rhan mewn cyfarfodydd Byrddau Moeseg genedlaethol i rannu dysgu ac arfer da.

Bydd gwaith y bwrdd yn cael ei arwain yn annibynnol gan y Cadeirydd Victoria Holbrook-Hughes gyda Phennaeth Cudd-wybodaeth Busnes HGC James Sutton fel Dirprwy Gadeirydd.

Bydd gan 10 aelod arall o HGC aelodaeth ar y bwrdd: yn cynnwys cymysgedd o unigolion wedi eu dethol o swyddi gweithredol ac anweithredol.

Bydd un aelod yn cael ei ddethol o Swyddfa'r Comisiynydd Heddlu a Throsedd.

Bydd y bwrdd hefyd yn cynnwys 10 aelod allanol, yn cynnwys myfyriwr o goleg lleol, un academydd uwch mewn maes perthnasol, tri aelod o Grŵp Ymgynghorol Annibynnol yr heddlu, un o Fwrdd Iechyd Prifysgol Betsi Cadwaladr ac aelodau eraill sydd eto i'w recriwtio.

Yn y fideo byr hwn mae Victoria Holbrook-Hughes yn trafod ei rôl ac yn rhoi crynodeb o'r gwaith mae'r bwrdd yn ei wneud a'i ddyletswyddau ehangach.

Mae gwella hyder y cyhoedd mewn plismona yn flaenoriaeth allweddol i Heddlu Gogledd Cymru ac o fewn cynllun ehangach Heddlu a Throsedd .

Mae'r Prif Gwnstabl Amanda Blakeman yn mynnu ei bod hi'n hanfodol i swyddogion heddlu weithio gyda'r cyhoedd yn agored ac yn dryloyw er mwyn adeiladu ymddiriedaeth.

Dywedodd: "Dw i'n croesawu sefydlu Bwrdd Moeseg ac, er lles tryloywder llwyr, mae'n iawn ei fod yn cael ei arwain yn annibynnol.

"Fel Prif Gwnstabl hoffwn sicrhau'r cyhoedd bod gwaith y bwrdd yn mynd i'r afael ac yn asesu materion moesegol ac yn gweithredu gyda thegwch wrth ei wraidd.

"Mae'n hanfodol ar gyfer dilysrwydd y gwasanaeth bod gan ein swyddogion, staff a gwirfoddolwyr ffydd yn y prosesau hyn.

"Hefyd, mae'n hanfodol i gymunedau lleol gael ymddiriedaeth a hyder yn yr heddlu.

"Mae ein hymgysylltiad cyhoeddus dwys yn chwarae rhan allweddol yn helpu pobl i deimlo'n ddiogel o fewn cymunedau Gogledd Cymru a byddwn yn ceisio'n gorau i gynnal y safonau uchel hynny.

"Mae gwaith y Bwrdd Moeseg yn alinio'n llawn gyda blaenoriaethau Heddlu Gogledd Cymru; yn bennaf - bod yn amlwg ac ymgysylltu â'n cymunedau; canolbwyntio ar drechu, atal a lleihau trosedd; a darparu gwasanaeth ardderchog i ddioddefwyr.

Dywedodd Andy Dunbobbin, Comisiynydd Heddlu a Throsedd Gogledd Cymru: "Fel Comisiynydd Heddlu a Throsedd Gogledd Cymru fi yw llais etholedig y bobl ym maes plismona, gan ddal yr heddlu i gyfrif a chreu cynllun cyffredinol y mae swyddogion yn gweithio iddo.

“Conglfaen y cynllun hwn yw sicrhau system cyfiawnder troseddol teg ac effeithiol ac - i mi - mae plismona effeithiol yn dechrau gyda heddlu y gellir ymddiried ynddo.

“Dw i'n cefnogi sefydlu'r Bwrdd Moeseg fel modd o hybu tryloywder ac arferion gweithio da ar draws y sefydliad y byddaf bob amser yn helpu eu hadeiladu.