Cyngerdd dathlu 50 mlynedd

Mae cyngerdd arbennig er mwyn nodi 50 mlynedd o Heddlu Gogledd Cymru yn cael ei gynnal yn y Rhyl mis nesaf.

Wedi’i drefnu gan dair cangen Cymdeithas Genedlaethol Swyddogion Heddlu wedi Ymddeol (NARPO), cynhelir y cyngerdd yn Theatr y Pafiliwn ar nos Sadwrn 5 Hydref am 7:30pm.

Bydd Côr Alaw, Côr Meibion Colwyn a band roc a rôl The Raccoons yn perfformio, ac mi fydd y noson yn cael ei harwain gan Dilwyn Price.

Mae tocynnau yn £5 yr un hefo’r holl elw yn mynd at Ymddiriedolaeth Goffa’r Heddlu.

Dywed Mel Jones, Cadeirydd Pwyllgor Cyswllt NARPO Gogledd Cymru: “Mae’r noson yn addo bod yn bleserus hefo rhywbeth i bawb ac yn gobeithio y bydd cymaint o bobl â phosibl yn gallu ymuno hefo ni.

“‘Da ni’n hynod o ddiolchgar am y gefnogaeth gan y corau a cherddorion talentog lleol, a ‘da ni’n edrych ymlaen at noson wych yn y theatr.”

Bydd y Prif Gwnstabl Amanda Blakeman yno ar y noson. Dywedodd: “Mae plismona wedi digwydd yng Ngogledd Cymru ers dros 160 o flynyddoedd ond cafodd Heddlu Gogledd Cymru, fel ‘da ni’n ei adnabod heddiw, ei greu yn swyddogol ar 1 Ebrill 1974.

“‘Da ni wedi nodi’r flwyddyn arbennig hon hefo nifer o weithgareddau gan gynnwys y Diwrnod Agored llwyddiannus a gynhaliwyd yn ddiweddar. ‘Da ni’n ddiolchgar iawn i dair cangen NARPO sydd yn trefnu’r noson arbennig yma ar ein rhan er mwyn dathlu’r 50 mlynedd, a ‘da ni’n edrych ymlaen yn ofnadwy at y noson.”

Mae Ymddiriedolaeth Goffa’r Heddlu yn gweithredu ar draws y DU o dan Siarter Frenhinol a roddwyd gan y Frenhines Elizabeth II yn 2018. Mae’r elusen yn bodoli er mwyn sicrhau nad ydy’r holl swyddogion heddlu hynny a gollodd eu bywydau wrth gyflawni dyletswydd byth yn cael eu anghofio.

Gellir archebu tocynnau gan y theatr yma: NARPO Golden Anniversary Concert – Rhyl Pavilion

Darganfyddwch fwy am NARPO drwy eu gwefan: NARPO – The Voice of Retired Police Officers

Er mwyn dysgu mwy am Ymddiriedolaeth Goffa’r Heddlu, ewch ar eu gwefan nhw: Police Remembrance Trust – Incorporated by Royal Charter (policememorial.org.uk)

Nodyn:

• Ffurfiwyd Heddlu Gogledd Cymru pan ddaeth siroedd newydd Gwynedd a Chlwyd i fod. Roedd yr heddlu’n gwasanaethu ardaloedd daearyddol y ddwy sir newydd fel roedd ei ragflaenydd sef Heddlu Gwynedd, a ffurfiwyd ar 1 Hydref 1967 ar ôl cyfuno Heddlu Sir y Fflint, Sir Ddinbych a Gwynedd. Roedd yr hen Heddlu Gwynedd yn cynnwys Sir Gaernarfon, Ynys Môn a Sir Feirionnydd.