Mwy o batrolau heddlu yn y Fflint i fynd i'r afael ag ymddygiad gwrthgymdeithasol

Mae patrolau amlwg ar gynnydd yn ardal y Fflint mewn ymdrech i leihau ymddygiad gwrthgymdeithasol. 

Daw hyn yn dilyn gofidion lleol yn ymwneud ag anhrefn yng nghanol y dref tua 7 o'r gloch ddoe (dydd Mawrth, 21 Mai) ^⁠lle bu 20 o bobl ifanc yn ymladd. 

Arweiniodd y digwyddiad yn Church St at yr Arolygydd Patrôl yn awdurdodi gorchymyn gwasgaru yng nghanol y dref.

Nid yw'r gorchymyn mewn lle bellach.

Daw hyn yn dilyn sawl adroddiad am grwpiau o bobl ifanc yn ymddwyn yn wrthgymdeithasol.

Dywedodd Arolygydd Gogledd Sir y Fflint, Wesley Williams: "Dw i'n deall bod yr ymddygiad gwrthgymdeithasol parhaus hwn yn peri gofid ac ofn i bobl yn y gymuned.

“Bydd trigolion yn gweld cynnydd mewn patrolau heddlu yn y dref ac yn y cyffiniau dros yr wythnosau nesaf er mwyn sicrhau na fydd ymddygiad fel hyn yn parhau."

Mae gorchmynion gwasgaru yn rhoi'r grym i swyddogion a SCCH gyfeirio unrhyw un sy'n ymddwyn yn wrthgymdeithasol i adael yr ardal a pheidio â dychwelyd am hyd at 48 awr o dan Adran 34 Deddf Troseddau Ymddygiad Gwrthgymdeithasol a Phlismona 2014.

Ychwanegodd yr Arolygydd Williams: "Rhoddwyd gorchymyn gwasgaru ddoe er mwyn sicrhau bod gan staff y pŵer i ddelio ag unrhyw broblemau pellach.  Nid yw'n weithredol bellach ond gall gael ei weithredu eto os bydd mwy o anhrefn yn digwydd.

Bydd ein Tîm Plismona'r Gymdogaeth yn parhau i weithio gyda busnesau, partneriaid a chymunedau er mwyn sicrhau bod trigolion yn teimlo'n ddiogel yn eu tref."

Daw'r patrolau ychwanegol yn y Fflint fel rhan o Ymgyrch Restore - cynllun wedi ei ariannu gan y Swyddfa Gartref i ymdrin ag ymddygiad gwrthgymdeithasol ar draws yr ardal. 

Mae Heddlu Gogledd Cymru wedi derbyn grant gwerth £1 miliwn tuag at ddileu ymddygiad gwrthgymdeithasol a thrais difrifol mewn ardaloedd sy'n achosi problemau.

Mae ein cymunedau'n chwarae rhan hanfodol yn ein cynorthwyo i atal a chanfod troseddau ac ymddygiad gwrthgymdeithasol. Rhybudd Cymunedol Gogledd Cymru yw gwasanaeth negeseuon cymunedol a gyflwynir i chi gan Heddlu Gogledd Cymru a phartneriaid. Mae'n rhoi'r wybodaeth ddiweddaraf i chi am droseddau, digwyddiadau ymgysylltu, apeliadau, cyngor atal a gweithgarwch plismona cyffredinol yn eich ardal leol.

Am fwy o wybodaeth ac i gofrestru ar gyfer rhybuddion cymunedol, ewch ar ein gwefan yma: Rhybuddion Cymunedol Gogledd Cymru | Heddlu Gogledd Cymru