Carcharu dyn o Sir y Fflint am gam-drin plentyn yn rhywiol

 

Mae dyn 42 oed wedi cael ei ddedfrydu heddiw am gam-drin plentyn yn rhywiol.

Gwadodd Sean Thomas Jones, o Ffordd Bagillt, Maes Glas, wyth cyhuddiad o ymosod yn rhywiol ar blentyn.

Ond cafodd ddedfryd euog unfrydol gan reithgor am yr holl gyhuddiadau yn dilyn ail achos yn Llys y Goron Yr Wyddgrug fis diwethaf, wedi i'r cyntaf fethu â dod i ddyfarniad.

Fe'i dedfrydwyd i 11 mlynedd yn Llys y Goron yr Wyddgrug heddiw (dydd Mercher, 15 Mai).

Cafodd Jones ei arestio ar 11 Ionawr 2021, pan fu'r dioddefwr ddigon dewr ac ymddiried yn ei mam a dweud ei bod wedi cael ei cham-drin yn rhywiol.

Roedd y cam-drin wedi digwydd yn rheolaidd dros gyfnod o dair blynedd, o'r adeg pan oedd y dioddefwr tua 12 oed. Ar adegau, byddai Jones yn cynnig gwin iddi, cyn ymosod arni'n rhywiol.

Byddai'n llwgrwobrwyo'r dioddefwr i gyflawni gweithrediadau rhywiol trwy gynnig prynu alcohol a thybaco iddi hi a'i ffrindiau yn gyfnewid, ac ar un achlysur, roedd wedi darparu melysion canabis bwytadwy iddi.

Dywedodd y Ditectif Ringyll Janette Williams sef y swyddog ymchwilio: "Mae troseddau Jones wedi cael effaith ddinistriol ar y dioddefwr, a gafodd ei chamddefnyddio a'i rhwydo ganddo dros gyfnod o dair blynedd.

"Nid yw wedi difaru dim trwy gydol yr achos, tra bod ei ymddygiad a'i droseddu o wedi cael effaith emosiynol barhaol ar y dioddefwr.

"Dwi'n ei chanmol hi am gymryd y cam anhygoel o ddewr o riportio troseddau Jones i ni, ac am ei hurddas a'i chryfder drwy gydol y ddau achos. Dwi hefyd am gydnabod dewrder y tystion a ddaeth ymlaen i ategu'r achos hwn.

"Dwi'n croesawu dedfryd hir heddiw, sy'n anfon neges glir y bydd trais yn erbyn merched a genethod ifanc yn cael ei gosbi. Ni fyddwn ni’n rhoi'r gorau i'n hymdrechion ni i ddod â throseddwyr o flaen eu gwell.

Ymgyrch Unite ydy ein hymateb ni i drais yn erbyn merched a genethod. Ceir mwy o wybodaeth yma – Ymgyrch Unite | Heddlu Gogledd Cymru