Canlyniadau cadarnhaol yn yr Arolwg Troseddu diweddaraf

Mae Heddlu Gogledd Cymru wedi dod yn gyntaf yn yr Arolwg Trosedd Cymru a Lloegr mwyaf diweddar, ym meysydd risg isaf bod yn ddioddefwr o drosedd (ag eithrio Troseddau Twyll a Camddefnyddio Cyfrifiadur), deall pryderon lleol, trin pobl â pharch a thrin pobl yn deg.

Mae hyder cyffredinol yn Heddlu Gogledd Cymru yn parhau i fod yn uchel, yn ôl data canfyddiad diwedd y flwyddyn i 2023.

Mae gwaith Heddlu Gogledd Cymru wedi arwain at gynnydd mewn sawl categori allweddol, yn golygu ei bod yn gyntaf mewn pedwar categori, ac yn y pump uchaf mewn sawl categori arall.

Cafodd y data, sy’n llunio rhan o Arolwg Trosedd Cymru a Lloegr, ei gyhoeddi ar ddiwedd mis Ebrill, ac yn dangos bod hyder cyffredinol yn parhau i fod yn uchel efo 72.8%, yn rhoi Gogledd Cymru y pumed uchaf ymysg heddluoedd Cymru a Lloegr.

Dywedodd y Prif Gwnstabl, Amanda Blakeman: ”Mae’r canfyddiad o drosedd yn bwysig iawn i ni ei ddeall, ac mae canlyniadau’r arolwg o ganfyddiad yn dangos bod ein gwaith wedi achosi canlyniadau sydd wir yn gadarnhaol.

“Mae’r arolwg hefyd wedi dangos bod Gogledd Cymru efo’r canlyniadau gorau am drin pobl â pharch. Mae hyn yn brawf o broffesiynoldeb ein staff, ac yn adlewyrchiad o’r gwaith caled maen nhw wedi ei wneud i ddatblygu ymddiriedaeth efo’n cymunedau, a ‘dwi’n diolch iddyn nhw am hyn.

“’Dwi’n falch iawn ein bod yn gweithio tuag at wneud Gogledd Cymru y lle mwyaf diogel i fyw, gweithio ac ymweld yn y DU, ac mae canlyniadau’r arolwg yma, ac eraill i 2023, yn dangos ein bod yn cymryd camau mawr tuag at wireddu hyn.

“Mae rhai o’r mesurau ‘da ni wedi eu cyflwyno wedi cyfrannu at hyn, megis creu swydd Swyddog Stelcian ac Aflonyddwch, gwaith ein timau Diogelu Trwy Ddyluniad, sy’n gweithio efo’r awdurdodau lleol i sicrhau bod datblygiadau tai newydd yn fwy diogel drwy’r dydd a’r nos, gwaith ein tîm Dangos y Drws i Drosedd, sydd wedi gweithio’n galed iawn i gynorthwyo dioddefwyr byrgleriaethau ac i atal troseddau pellach. Mae nhw wedi ymweld â 1,407 o ffermydd ers mis Mai 2023 a 3,511 o gartrefi ers mis Mawrth 2023.

“Yn ychwanegol, hoffwn amlygu waith di-baid ein swyddogion ac archwilwyr sydd ar y rheng flaen, sy’n erlid troseddwyr, yn atal troseddau ac yn amddiffyn ein cymunedau.”

Os oes gennych unrhyw gwestiynau am yr heddlu yn eich hardal, neu am y mentrau a ddisgrifiwyd, cysylltwch efo ni drwy wefan Heddlu Gogledd Cymru.