SWYDDOG WEDI’I DDISWYDDO YN DILYN GWRANDAWIAD CAMYMDDWYN

Yn dilyn gwrandawiad camymddwyn gafodd ei gynnal yn ddiweddar ym Mhencadlys yr Heddlu, mae swyddog wedi ei ganfod yn euog o gamymddygiad difrifol, ac wedi ei ddiswyddo o’r heddlu, sy’n effeithiol ar unwaith.

Mi wynebodd y cyn-Gwnstabl 3352 Owain Lewis honiad ei fod, ar 16 Rhagfyr 2022, pan nad oedd ar ddyletswydd, wedi mynd i gyfeiriad yn ardal Bwcle, Sir y Fflint. Tra yno, ‘roedd yn gyfrifol am weithrediad o drais tuag at eiddo, ac o ganlyniad, mi achosodd ddifrod i ffôn symudol. Digwyddodd hyn mewn lleoliad domestig.

Mi ganfuwyd bod Lewis wedi torri rheolau Safonau Ymddygiad Proffesiynol, yn ymwneud ag Ymddygiad Annheilwng.

Ar ben cael ei ddiswyddo heb rybudd, mi fydd hefyd ar restr waharddedig yn ei atal rhag gwasanaethu fel swyddog heddlu unrhyw bryd yn y dyfodol.

Yn siarad ar ôl cwblhau y gwrandawiad, dywedodd y Dirprwy Prif Gwnstabl, Nigel Harrison: “’Da ni’n disgwyl y safonau a’r proffesiynoldeb uchaf oddi wrth ein holl swyddogion a staff yr heddlu, pan maen nhw ar ddyletswydd, a phan nad ydyn nhw ar ddyletswydd.

“’Roedd gweithrediadau y cyn-Gwnstabl Lewis yn amhriodol, yn amhroffesiynol, ac yn annerbyniol.

“Mae’r math yma o ymddygiad yn tanseilio ymddiriedaeth a hyder  mewn plismona. Mae Heddlu Gogledd Cymru yn cymryd bob hysbysiad o gam-drin domestig a thrais tuag at ferched a genethod o ddifri. Safbwynt Heddlu Gogledd Cymru ydy  ymchwilio yr holl faterion yn gadarn, er mwyn sicrhau ein bod yn cynnal ymddiriedaeth y cyhoedd, sy’n cael ei arddangos drwy’r canlyniad hwn.

“Da ni’n annog unrhyw un efo pryderon o’r math yma i siarad efo ni – nid  ydych chi ar eich pen eich hun, mi wnawn ni wrando, ac mi fydd eich profiadau yn cael eu cymryd yn wirioneddol o ddifri.”