Dyn a guddiodd mewn gardd cyn ymosod ar ei gyn-gymar wedi ei garcharu

Mae dyn, 37 oed, a guddiodd mewn gardd cyn ymosod ar ei gyn-gymar ar y stryd wedi ei garcharu.

Ar adeg y digwyddiad, roedd yn destun gorchymyn atal, ar ôl cynnau tân yn fwriadol i'w drws ffrynt bedair blynedd ynghynt.

Mi ymddangosodd Mark Harrison o City Road, Caer, ond yn wreiddiol o Wrecsam, gerbron Llys y Goron, yr Wyddgrug am ddedfrydu ddoe (dydd Iau, 22 Awst).

Mi gyfaddefodd aflonyddu drwy dorri gorchymyn atal ac ymosod gan achosi gwir niwed corfforol mewn gwrandawiad blaenorol.

Cafodd ddedfryd am ddwy flynedd a thri mis yn y carchar ac mi gafodd orchymyn atal 10 mlynedd er mwyn amddiffyn y dioddefwr a'u plant.

Mi ddigwyddodd yr ymosodiad ar 7 Mehefin, ar ôl i Harrison ollwng ei blant i ffwrdd gyda'i gyn-gymar yng nghyfeiriad perthynas.

Ar ôl gofyn iddo adael oherwydd ei bod yn cwrdd â ffrind, anfonodd negeseuon sarcastig iddi, ac mi ddangosodd hi nhw i'w ffrind.

Mi ofynnodd o gwrdd â'i ffrind, gan ei bygwth â thrais os na fyddai o'n cael gwneud hynny.

Wrth i'r dioddefwr gerdded adref, mi ymddangosodd Harrison o ardd yn y stryd, lle gwthiodd o’r dioddefwr i'r llawr cyn ei chicio a'i dyrnu nifer o weithiau.

Mi redodd i ffwrdd, ond mi ddychwelodd a'i dyrnu yn ei  hwyneb cyn rhedeg i ffwrdd unwaith eto.

Dywedodd y Prif Dditectif Arolygydd, Dean Jones:  "Roedd hwn yn ymosodiad treisgar direswm ar gyn-cymar Harrison, ac mae'n rhaid ei fod wedi bod yn brofiad dychrynllyd iddi hi a'i theulu.

"Mae ei dewrder a'i  chefnogaeth barhaus drwy gydol yr ymchwiliad wedi bod yn ganmoladwy.

"Ein blaenoriaeth ni yw mynd i'r afael â phob hysbysiad o drais yn erbyn merched, ac mi fyddwn yn parhau i ddwyn troseddwyr o flaen eu gwell, gan geisio amddiffyn merched rhag niwed bob amser."