Carcharu dyn am ymosodiad un ergyd yn Wrecsam

 

Mae dyn 21 oed wedi cael ei garcharu yn dilyn ymosodiad treisgar yn y stryd yn Wrecsam.

Aethpwyd â'r dioddefwr, a gafodd ei guro i'r llawr yn anymwybodol yn dilyn un ergyd i Ysbyty Stoke gydag anaf i'w ymennydd.

Bu'n rhaid iddo gael llawdriniaeth y diwrnod hwnnw i helpu trin gwaedu ar yr ymennydd. 

Cyfaddefodd Brandon Morris o Kingsway, Caer ei fod wedi achosi niwed corfforol difrifol ac ymddangosodd yn Llys y Goron yr Wyddgrug heddiw sef dydd Iau, 29 Awst i gael ei ddedfrydu.

Cafodd ei garcharu am 16 mis.

Digwyddodd yr ymosodiad yng nghanol dinas Wrecsam yn ystod oriau man bore Sul, 10 Rhagfyr y llynedd.

Rhedodd Morris i fyny at y dioddefwr a'i daro yn ei wyneb gan wneud iddo ddisgyn ar lawr.

Cafodd anafiadau i'w benglog, a chleisiau a gwaedlif i'w ymennydd.

Yn dilyn y llawdriniaeth, darganfuwyd clot gwaed ar ei ymennydd, gan arwain at dynnu darn o asgwrn ei benglog i ryddhau pwysau. 

Dywedodd Ditectif Gwnstabl Danielle Craig:  "Mae'r ddedfryd hon heddiw yn dangos pa mor ddifrifol gall un ergyd fod a'r effaith ofnadwy y gall gael ar rywun.

“Arweiniodd ymddygiad Morris at anafiadau a fydd yn newid bywyd y dioddefwr. Roedd yn ymosodiad treisgar a hollol diangen ar ddyn ifanc llwyddiannus a oedd yn llawn uchelgais.

“Bellach, nid yw'n gallu gweithio ac mae'n anghofus, ymysg nifer o symptomau eraill. Bydd angen mwy o lawdriniaethau oherwydd yr ymosodiad.

"Gobeithio y bydd yr achos hwn yn anfon neges gref i rai sy'n ystyried ymosod ar unrhyw un."