Carcharu dyn am ddelio cyffuriau mewn gŵyl ar Ynys Môn
Cynnwys y prif erthygl
Mae dyn 24 oed a fu'n delio cyffuriau mewn gŵyl ar Ynys Môn a chlwb nos ym Mangor wedi cael ei garcharu.
Ymddangosodd Osian Rhys Williams o Stryd Bangor, y Felinheli yn Llys y Goron, Caernarfon heddiw, dydd Mercher 6 Mawrth am gyflenwi cyffuriau dosbarth A a B ac am fod â chyffuriau yn ei feddiant gyda'r bwriad o gyflenwi cyffuriau dosbarth A a B.
Ar 19 Mehefin 2022, gwelwyd Williams yn delio cyffuriau gan swyddogion diogelwch yng ngŵyl gerddorol Gottwood ar Ynys Môn. Canfuwyd bod ganddo fagiau yn cynnwys cocên, ketamine, LSD ac ecstasy gwerth £1100 yn ei feddiant.
Yn ystod oriau mân 29 Mai 2023, aeth yr heddlu i glwb nos Cube ym Mangor yn dilyn adroddiadau bod Williams yn ceisio delio cyffuriau yno. Canfuwyd ketamine, cocên a LSD gwerth £550. Cafwyd hyd i £188 o arian parod hefyd.
Derbyniodd ddedfryd o dair blynedd ac wyth mis o garchar.
Dywedodd Ditectif Gwnstabl Jamie Atkinson: "Bydd y rhai hynny sy'n troseddu yn wynebu'r canlyniadau.
"Fe wnawn ni barhau i fynd ati i erlid unrhyw un sy'n dod â chyffuriau i Wynedd a Môn ac sydd yn dal mantais ar aelodau bregus yn y gymuned er eu lles hunanol eu hunain.
"Buaswn i'n annog unrhyw un hefo gwybodaeth am gyffuriau yn eu hardal leol i roi gwybod i'r heddlu drwy ein gwefan, neu drwy alw 101 yn anhysbys drwy Crimestoppers."