Dyma Arolygydd newydd dinas Wrecsam

 

Dyma Heidi Stokes, Arolygydd newydd dinas Wrecsam.

Gwnaeth yr Arolygydd Stokes, sydd wedi gwasanaethu fel swyddog yn Heddlu Gogledd Cymru am y 23 mlynedd diwethaf, dderbyn ei swydd newydd ym mis Tachwedd, gan ddilyn yr Arolygydd Luke Hughes a dod yr arolygydd benywaidd cyntaf i arwain yr ardal.

A hithau wedi bod yn rheolwr digwyddiadau'r heddlu, yn monitro gweithgarwch plismona gweithredol a chyfarwyddo gosod adnoddau mewn ymateb i ddigwyddiadau, mae'r Arolygydd Stokes wedi gweithio mewn sawl ardal o'r heddlu – yn bennaf yn cwmpasu ardal dinas Wrecsam. 

O Gernyw yn wreiddiol, cafodd Heidi, sy'n 52 oed, ei magu yng Ngogledd Cymru. Dechreuodd ei gyrfa yn ninas Wrecsam fel swyddog ymateb yn 27 oed. Roedd wedi dychwelyd i'r ardal yn dilyn cyfnod o saith mlynedd yn yr Unol Daleithiau, gan weithio fel cynorthwyydd gweithredol.

Ar ôl dwy flynedd o fod yn swyddog ymateb, dechreuodd weithio yng 'Nghar Troseddau Rhagweithiol' y ddinas, sef cerbyd plaen yn darparu gallu plismona rhagweithiol a thargedu ardaloedd yn Wrecsam lle nodwyd bygythiad a risg.

Parhaodd ei gyrfa yn Wrecsam am 11 mlynedd arall fel cwnstabl a rhingyll ymateb ar y rheng flaen cyn dod yn rhingyll y ddalfa, eto yn Wrecsam.

Ar ôl symud i'r Rhaglen Gwella Gweithrediadau (OIP) yn 2018, dechreuodd ei rôl fel Rheolwr Digwyddiadau'r Heddlu yn 2020, wythnosau cyn y gorfodwyd cyfyngiadau symud ar y wlad. Arhosodd yno tan iddi gael ei phenodi'n Arolygydd dinas Wrecsam. 

Dywedodd yr Arolygydd Stokes: "Roeddwn i'n gwybod erioed fy mod eisiau dychwelyd i Wrecsam. Dyna lle ddechreuodd fy ngyrfa i. Dwi'n meddwl fod rhywbeth eithaf arbennig am symud drwy'r rhengoedd yn yr un ardal."

Wrth drafod ei chynlluniau ar gyfer dinas Wrecsam, bydd hi'n canolbwyntio ar barhau ymdrin â materion er budd y cymunedau yn ein dinas a'i gwneud yn lle mae pobl yn "falch o fyw a gweithio ynddi ac ymweld â hi".

Fe ychwanegodd: "Dwi eisiau dinas Wrecsam fod yn fan lle mae'r tîm yn hapus, cynhyrchiol, yn ymgysylltu ac yn angerddol ynghylch dod i'r gwaith a gwneud swydd heriol yn aml."

"Mae fy nhîm yn allweddol er mwyn rhoi gwasanaeth gwych i ddioddefwyr, lleihau trosedd, a gwneud y ddinas yn fan digroeso i unigolion sy'n troseddu. 

"Dwi eisiau iddo fod yn fan lle mae pobl yn falch o fyw, gweithio ac ymweld.

"Ond mae'r heddlu'n methu gwneud pob dim eu hunain. Felly dwi'n awyddus iawn creu cysylltiadau ymarferol cryf hefo'n partneriaid er mwyn taclo materion er budd cymunedau ein dinas ni."

Fe wnaeth yr Arolygydd Stokes hefyd egluro'r hyn mae'n ei hoffi fwyaf am y swydd.

Dywedodd: "Dwi'n falch iawn o fod yn swyddog heddlu a dwi wedi cael swyddi gwych yn ystod fy ngyrfa. Dwi wedi mwynhau bob un am wahanol resymau.

⁠"Fodd bynnag, mae rhywbeth unigryw am fod hwnt ac yma yn y cymunedau a mynd ar drywydd y rhai hynny sy'n achosi niwed i ni, ond hefyd, deall eu rheswm am wneud a'r hyn allwn ni i'w atal."