Darganfod ffatri ganabis yng Nghaergybi

Mae oddeutu 400 o blanhigion canabis wedi cael eu hatafaelu yn dilyn gwarant yng Nghaergybi.

Ar ddydd Mawrth 9 Ionawr, cynhaliodd swyddogion warant mewn eiddo ar Stryd y Farchnad.

Ar ôl mynd mewn i’r adeilad, cafodd swyddogion hyd i fferm ganabis soffistigedig, hefo oddeutu 400 o blanhigion wedi gwasgaru rhwng pedair ystafell.

Mae nifer o eitemau wedi cael eu hatafaelu wrth i’n hymchwiliadau barhau.

Dywedodd y Rhingyll Cymorth Ardal Iwan Jones: “‘Da ni’n diolch i’r gymuned am eu help a’u gwybodaeth parhaus wrth i ni geisio cau a dinistrio ffatrïoedd canabis ar Ynys Môn. ‘Da ni hefyd wedi ymroi gwarchod pobl fregus ac ifanc cymuned Caergybi sy’n aml yn cael eu targedu gan droseddwyr drwy geisio dod â chyffuriau i’r ardal.”

Gall unrhyw un hefo pryderon am gyflenwi cyffuriau yn eu hardal nhw roi gwybod i ni drwy ein gwefan ni neu drwy ffonio 101, neu’n ddienw drwy Crimestoppers.