Plannu coeden i goffáu hanner canmlwyddiant Heddlu Gogledd Cymru

Mae bedwen arian wedi ei phlannu ar dir Pencadlys yr Heddlu ym Mae Colwyn i goffàu pen-blwydd Heddlu Gogledd Cymru yn 50.

Mae plismona wedi bodoli yng Ngogledd Cymru ers dros 160 mlynedd ond ffurfiwyd Heddlu Gogledd Cymru fel yr ydym yn ei adnabod bellach ar 1 Ebrill 1974.

Ffurfiwyd Heddlu Gogledd Cymru pan sefydlwyd siroedd newydd Gwynedd a Chlwyd. Roedd yr heddlu yn gwasanaethu ardaloedd daearyddol y ddwy sir newydd fel y gwnaeth ei ragflaenydd, Heddlu Gwynedd a ffurfiwyd ar 1 Hydref 1967 yn sgil uno heddluoedd Sir y Fflint, Sir Ddinbych a Gwynedd, gyda’r olaf o’r rhain wedi bod yn heddlu dros Sir Gaernarfon, Sir Fôn a Sir Feirionnydd.

Yn ystod y seremoni fach, dadorchuddiwyd plac gan y Prif Gwnstabl, Amanda Blakeman, i goffàu 50 mlynedd o fodolaeth Heddlu Gogledd Cymru.

Dywedodd Prif Gwnstabl Blakeman: “Mae’r seremoni plannu’r goeden yn un o lawer o ddigwyddiadau i’w cynnal drwy gydol y flwyddyn i ddathlu ein pen blwydd yn 50.

“Mae gweithgareddau wedi eu trefnu dros yr haf, drwy fynychu sioeau a digwyddiadau, ac fe fyddwn yn cynnal ein Diwrnod Agored poblogaidd ym Mae Colwyn ym mis Medi.

“’Rydym hefyd yn gweithio efo NARPO (y gymdeithas genedlaethol i swyddogion sydd wedi ymddeol) i drefnu cyngerdd ym Mhafiliwn Y Rhyl ym mis Hydref, ac hefyd ein Gwobrau Heddlu ym mis Tachwedd.

“Er bod llawer wedi newid ers 1974, mae ein gwerthoedd creiddiol wedi aros yr un fath – i amddiffyn pobl rhag niwed, i ddal troseddwyr ac i gadw ein cymunedau’n ddiogel.

“Mae Heddlu Gogledd Cymru wedi newid llawer dros y 50 mlynedd diwethaf, newidiadau sydd wedi bod yn angenrheidiol i gadw a gwella ein gwasanaethau heddlu. Mae technoleg wedi symud ymlaen i drawsnewid sut yr ydym yn gweithio heddiw, ac i’n helpu i ddatrys troseddau’n fwy cyflym – mae swyddogion yn medru gweld delweddau a chael gafael ar wybodaeth drwy wasgu botwm, ‘rydym wedi buddsoddi yn drwm yn nhechnoleg diweddaraf drôn, ac mae ein fflyd wedi moderneiddio, efo cerbydau trydanol yn cael eu defnyddio ar ein ffyrdd.

“Wrth gwrs, mae cydraddoldeb i ferched wedi dod yn ei flaen – ni fuasai neb wedi meddwl 50 mlynedd yn ôl fod merch yn medru bod yn Brif Gwnstabl! Un peth allweddol yr ydym wastad wedi medru dibynnu arno ydi cefnogaeth y cymunedau ‘rydym yn eu gwasanaethu. Mae’r cyfraniad gan gymunedau Gogledd Cymru i’n helpu i drechu trosedd yn werthfawr, ac hoffwn ddiolch i bawb am eu cefnogaeth.

“’Dwi’n falch o’r heddlu fodern sydd gennym heddiw, ac yn falch ofnadwy o dywys sefydliad sy’n llawn o swyddogion, staff a gwirfoddolwyr ymroddgar sy’n gweithio’n galed i ddarparu’r gwasanaeth orau posib i’n cymunedau.”

Fe ddewiswyd y goeden 10 troedfedd i weddu efo’r coed sydd ar dir y pencadlys yn barod. Fe all dyfu hyd at 24 medr o daldra, ac mae’n werthfawr i fyd natur, megis adar bach, a gaiff eu denu gan y llu o hadau a phryfaid sy’n byw ynddi.

I weld atgofion a’r wybodaeth ddiweddaraf am ddathliadau pen-blwydd HGC yn 50, dilynwch #NWP50 ar ein sianelau cyfryngau cymdeithasol, a drwy ein gwefan Heddlu Gogledd Cymru