Dafad feichiog wedi cael ei lladd mewn ymosodiad gan gi yn Sir y Fflint

Mae dafad feichiog wedi cael ei lladd mewn ymosodiad gan gi yn Sir y Fflint.

Anafwyd tair dafad feichiog arall hefyd.

Digwyddodd yr ymosodiad mewn cae ger Lôn Kelsterton yn Llaneurgain rhwng 10am ar ddydd Iau, 15 Chwefror a 9am ar ddydd Gwener, 16 Chwefror.

Dywedodd PC Michelle Allsup o Dîm Troseddau Cefn Gwlad: “Rwyf yn apelio ar unrhyw un gyda gwybodaeth yng nghyswllt y digwyddiad i gysylltu â ni cyn gynted â phosib.

“Mae ymosodiadau ar anifeiliaid fferm yn erchyll, nid yn unig i’r anifeiliaid eu hunain,  ond mae hefyd yn cael effaith andwyol ar gymunedau,  yn ariannol ac yn feddyliol.

“Mae’n gyfnod wyna ar hyn o bryd ac mae ffermwyr yn gweithio ddydd a nos yn diogelu eu hanifeiliaid, er mwyn sicrhau eu bod yn cael eu geni’n iach ac yn ddiogel.

“Gwnewch yn siŵr bod eich ci yn cael ei gadw ar dennyn byr o gwmpas da byw bob amser.

“Os ydych yn gwybod am gi sydd wedi dianc mewn ardal wledig, dylech gysylltu â’r heddlu cyn gynted â phosib fel y gall ffermwyr a thirfeddianwyr gael gwybod.”

Dylai unrhyw un â gwybodaeth gysylltu â ni ar 101, neu drwy’r wefan, gan ddefnyddio’r cyfeirnod Q022756.