Apêl am dystion yn dilyn gwrthdrawiad angheuol yn Wrecsam
Cynnwys y prif erthygl
'Da ni'n apelio am dystion yn dilyn gwrthdrawiad angheuol yn Wrecsam dros nos.
Toc ar ôl 12am y bore yma (dydd Sul, 22 Hydref), fe wnaethon ni dderbyn adroddiad fod cerddwr a oedd yn cerdded ar yr A483 tua'r gogledd rhwng Cyffordd 4 (A525 Ffordd Rhuthun) a Chyffordd 5 (cyfnewidfa Ffordd yr Wyddgrug) wedi cael ei daro gan gerbyd.
Fe wnaeth y gwasanaethau brys ymateb, ond yn anffodus, cyhoeddwyd fod y dyn yn farw yn y fan a'r lle.
Mae teulu'r dyn a'r crwner wedi cael gwybod.
Mae'r ffordd wedi ail-agor bellach ac mae ymholiadau'n parhau ynghylch y digwyddiad.
Dywedodd y Ditectif Gwnstabl Donna Vernon: "'Da ni’n estyn ein cydymdeimlad at deulu a chyfeillion y dyn yn ystod y cyfnod anodd hwn."
"Dwi'n annog unrhyw un sydd efallai wedi bod yn teithio ar hyd yr A483 ar adeg y digwyddiad, neu unrhyw un sydd efallai hefo ffilm camera cerbyd i gysylltu hefo ni.
“Hoffwn hefyd ddiolch i fodurwyr am eu hamynedd tra roedd y ffordd ar gau."
Dylai unrhyw un sydd â gwybodaeth a allai helpu'r ymchwiliad gysylltu hefo ni drwy'r sgwrs we fyw neu drwy ffonio 101, gan ddyfynnu'r rhif 23001039592.