Canlyniad positif yn ymwneud â thrais yn erbyn merched a genethod ym mis Hydref

 

'Da ni'n parhau hefo'n gwaith o atal trais yn erbyn merched a genethod, helpu dioddefwyr ac ymlid troseddwyr.

Mae'r term 'trais yn erbyn merched a genethod' yn cyfeirio at drais neu gam-drin 'da ni'n gwybod sy'n effeithio'n anghymesur ar ferched a genethod.

Mae troseddau'n cynnwys treisio a throseddau rhywiol eraill, stelcio, cam-drin domestig, cam-drin 'ar sail anrhydedd' (gan gynnwys llurgunio organau cenhedlu merched, priodasau o dan orfod a lladdiadau 'anrhydedd'), 'pornograffi dial' a 'thynnu lluniau dan dîn, ynghyd â llawer o rai eraill.

Drwy gydol mis Hydref, bu 162 o ganlyniadau cadarnhaol o ran y rhai hynny a amheuwyd o fod wedi troseddu yng ngogledd Cymru.

Mae canlyniad cadarnhaol yn golygu camau wedi'u cymryd gan yr heddlu unwaith mae digwyddiad wedi'i riportio i ni ac mae rhywun wedi cael eu harestio. Gall hyn gynnwys sawl canlyniad, er enghraifft cyhuddiad, rhybudd neu raglen sy'n gweithio er mwyn delio hefo achosion sylfaenol y troseddu.

O'r 162 canlyniad y mis diwethaf, arweiniodd cyfanswm o 120 at gyhuddiad.

Ar ben hyn, rhoddwyd dau rybudd a 35 o ddatrysiadau cymunedol, lle mae'r troseddwr yn derbyn cyfrifoldeb neu'n gwneud rhyw fath o iawn am rywbeth.

O'r holl ganlyniadau cadarnhaol, roedd 44% (71 o droseddau) yn ymwneud â throseddau domestig.

Roedd bron i 36% yn achosion o drais a arweiniodd at anaf corfforol, tra roedd bron i chwarter yn ymwneud â throseddau stelcio ac aflonyddu.

Roedd ychydig dros 12% o'r canlyniadau cadarnhaol o achosion a oedd yn cynnwys rhywun yn bygwth y gall rhywbeth mwy difrifol ddigwydd.

Tra bod ni'n defnyddio'r term 'trais yn erbyn merched a genethod' drwy gydol yr adroddiad hwn, mae hyn y cyfeirio at holl ddioddefwyr unrhyw un o'r troseddau hyn.