Ymgyrch yn erbyn gyrru o dan ddylanwad alcohol a chyffuriau dros yr Ŵyl

‘Ni ddylech gael eich twyllo os ydych yn mynd tu ôl i’r llyw o dan ddylanwad alcohol neu gyffuriau, rydych mewn perygl o gael dirwy, colli’ch trwydded neu dderbyn dedfryd o garchar. Rydych yn peryglu bywydau hefyd,’ – dyna’r neges sy’n cael ei chyhoeddi gan Heddlu Gogledd Cymru wrth iddynt baratoi i lansio eu hymgyrch yn erbyn yfed a gyrru a gyrru o dan ddylanwad cyffuriau dros gyfnod y Nadolig.

Mae’r ymgyrch mis o hyd yn erbyn gyrru o dan ddylanwad yn dechrau ar Ddydd Gwener, 1 Rhagfyr a bydd heddluoedd ar draws y wlad yn defnyddio tactegau cudd-wybodaeth a gwybodaeth leol o lecynnau sydd ag enw drwg i ganfod pobl sy’n gyrru o dan ddylanwad cyffuriau ac alcohol dros gyfnod yr Ŵyl.

Bydd Heddlu Gogledd Cymru yn defnyddio’r cyfryngau cymdeithasol ynghyd â hysbysebu digidol i ledaenu’r neges am effaith yfed a gyrru a gyrru o dan ddylanwad cyffuriau. Bydd hyn yn cynnwys fan hysbysebu ddigidol a fydd yn teithio ar draws Gogledd Cymru ar ddyddiau allweddol drwy gydol mis Rhagfyr, a hysbysfyrddau ddigidol mewn canolfannau siopa ym Mangor, Bae Colwyn, y Rhyl a Wrecsam a fydd yn dangos negeseuon drwy gydol yr ymgyrch. Mae posteri hefyd yn cael eu dosbarthu o amgylch tafarndai, ysgolion uwchradd a cholegau.

Wedi’i arwain gan Uned Troseddau’r Ffyrdd, bydd swyddogion o’r timau i gyd allan – gan gynnwys plismona lleol, yr heddlu arfog ynghyd â’r Heddlu Gwirfoddol – ddydd a nos yn targedu’r rhai sy’n peryglu eu hunain a phobl eraill.

“Cnocio ar ddrws rhywun i ddweud bod un annwyl iddynt wedi cael eu lladd oherwydd bod gyrrwr wedi gwneud penderfyniad hunanol i yrru o dan ddylanwad alcohol neu gyffuriau yw’r rhan waethaf o fy swydd,” meddai’r Prif Arolygydd Caroline Mullen-Hurst o Uned Troseddau’r Ffyrdd, Heddlu Gogledd Cymru.

“Does dim geiriau i ddisgrifio’r difrod sy’n cael ei achosi gan yrru o dan ddylanwad a dyma pam rydym yn teimlo’n angerddol am yr hyn yr ydym yn ei wneud. Wrth i ddathliadau’r Ŵyl gychwyn nid yn unig yr rydym yn atgoffa gyrwyr o’r peryglon ond rydym hefyd yn amlygu’r canlyniadau o yrru tra o dan ddylanwad.

“Gall unrhyw un sy’n cael ei ddal wynebu 12-18 mis o waharddiad a hoffem i bobl feddwl o ddifri sut y byddai hyn yn effeithio eich bywyd; gyrru i’r gwaith neu goleg neu fynd â phlant i’r ysgol, cymdeithasu neu ymweld â theulu. Mae effaith colli eich trwydded yn enfawr. Gallwch hefyd golli eich gyrfa a’ch cartref. Yn waeth na hynny, mi allech anafu neu ladd eich hun neu rywun arall. Nid yw hi’n werth mentro.

“Mi fydd timau yn gweithio 24 awr y dydd, saith diwrnod yr wythnos a dylai unrhyw un sy’n ystyried gyrru dan ddylanwad wybod y byddwn allan yn disgwyl amdanynt – plis peidiwch a meddwl bod natur y ffyrdd wledig yn eich gwarchod.

“Mae swyddogion yn wyliadwrus drwy’r flwyddyn ond ar yr adeg hon o’r flwyddyn byddant yn eich dal a byddwch yn gorfod wynebu’r canlyniadau. Rhaid i yrwyr sylweddoli y byddant yn wynebu'r un gosb pa bynnag adeg o’r dydd yw hi.  Nid yw mynd i’r gwaith neu fynd â’r plant i’r ysgol yn esgus, byddant yn wynebu'r un gosb â rhywun sydd wedi bod i’r dafarn ac yn gyrru yn y nos.

Fe ychwanegodd: “Mae ein neges yn un syml; os ydych yn mynd allan ac yn gwybod y byddwch yn yfed, sicrhewch eich bod wedi gwneud trefniadau i fynd adref yn ddiogel heb yrru.

“Rydym wedi ymrwymo i ddiogelu’r ffyrdd i bawb a byddwn yn parhau i dargedu’r rhai sy’n peryglu bywydau pobl eraill. Peidiwch ag yfed o dan ddylanwad alcohol neu gyffuriau – mae hyd yn oed cyfanswm fach yn gallu effeithio ar eich gallu i yrru’n ddiogel. Peidiwch a gadael i’ch teulu ddioddef oherwydd eich camgymeriad chi.

"Rydym yn targedu’r rhai sy’n peryglu bywydau drwy gydol y flwyddyn, nid yn unig ar adeg y Nadolig. Hyd hyn eleni (Ionawr at Dachwedd) rydym wedi gwneud 868 o arestiadau am yrru dan ddylanwad alcohol a 786 o arestiadau am yrru o dan ddylanwad cyffuriau. Plis helpwch ni i ddiogelu’r ffyrdd drwy gydol y flwyddyn. Mae gwybodaeth gan y cyhoedd yn hanfodol i wneud y gwaith yma, felly os ydych yn gwybod am rywun sy’n gyrru dan ddylanwad, plis gwnewch y peth iawn a riportiwch nhw i ni drwy ffonio 101”

Meddai Andy Dunbobbin: “Fel Comisiynydd Heddlu a Throsedd, rwyf yn cefnogi Heddlu Gogledd Cymru yn lansio eu hymgyrch yn erbyn yfed a gyrru ac yfed o dan ddylanwad cyffuriau eleni.

“Mae damweiniau a marwolaethau ar y ffordd fawr yn drasig ar unrhyw adeg o’r flwyddyn, ond i deulu glywed bod anwyliaid wedi eu hanafu neu wedi marw ar adeg mor arbennig, mae hyn yn beth hynod o anodd – yn fwy byth pan fydd o achos ymddygiad rhywun o dan ddylanwad diod neu gyffuriau.

“Ni ddylai unrhyw deulu neu ffrindiau orfod agor y drws neu godi’r ffôn i glywed newyddion fel hyn. Dyna pam mae diogelwch ar y ffyrdd yn rhan allweddol o fy nghynllun i wneud ein hardal yn fwy diogel i drigolion ac ymwelwyr fel ei gilydd.

“Gobeithio y bydd y Nadolig hwn a’r Flwyddyn Newydd yn gyfle i fwynhau yn ddiogel heb ddioddef troseddau Yfed a Gyrru nac Yfed o Dan Ddylanwad Cyffuriau ac rwyf yn diolch i Uned Troseddau’r Ffyrdd yn Heddlu Gogledd Cymru am eu gwaith caled a’u hymroddiad yn ein cadw ni i gyd yn ddiogel.”

Os credwch fod rhywun yn gyrru a ddim yn gymwys i wneud hynny, riportiwch o ar unwaith i’r heddlu ar 101 (neu 999 os oes rhywbeth peryglus ar fin digwydd) neu ffoniwch Crimestoppers yn ddienw ar 0800 555 111.

Gall defnyddwyr y cyfryngau cymdeithasol ddilyn yr ymgyrch drwy’r hashnodau #OpLimit a #5Angheuol

Nodiadau:

• Yn 2022, fe wnaeth Heddlu Gogledd Cymru 914 o arestiadau am yrru dan ddylanwad alcohol a 798 am yrru o dan ddylanwad cyffuriau.
• Roedd 29% o yrwyr a gafodd eu dal yn gyrru o dan ddylanwad cyffuriau yng Ngogledd Cymru rhwng 2018 a 2022 rhwng 16 a 25 oed. Roedd 1/6 o’r profion cyffuriau a roddwyd ar gyfer canabis.
• Roedd 18% o yrwyr a gafodd eu dal yn gyrru ac yfed yng Ngogledd Cymru rhwng 2018 a 20222 rhwng 16 a 25 oed.