RHYBUDD TWYLL CLUDO YN SGIL NIFER O DDIGWYDDIADAU AR DRAWS GOGLEDD CYMRU

Rydym yn annog trigolion gogledd Cymru i ddiogelu eu hunain yn erbyn twyll cludo.

Rydym wedi gweld cynnydd diweddar mewn twyll cludo lle mae pobl fregus wedi cael colli eu harian a gwybodaeth bersonol. Fel arfer, yr henoed sy'n dioddef fwyaf o dwyll cludo.

Yn yr achos diweddaraf, mi wnaeth y twyllwr ffonio'r dioddefwr gan honni eu bod yn dod o'r banc. Mae dioddefwyr yn cael eu cynghori bod eu cerdyn banc wedi cael ei ddefnyddio yn anghyfreithlon a bod cyfrif banc y dioddefwr mewn peryg.

 

Mae dioddefwyr wedi cael eu twyllo i ddatgelu eu manylion PIN a cherdyn debyd. Mae sgiamwyr naill ai yn anfon cludwyr i gasglu cardiau banc o gyfeiriad y dioddefwyr neu fod y dioddefwyr wedi cael cyfarwyddid i lapio eu cerdyn banc mewn ffoil a'i anfon drwy'r post.

 

Wedi i'r sgiamwyr gael cerdyn y dioddefwr a'r PIN, maent yn gwario eu harian ar drosglwyddiadau mawr a thynnu arian parod allan o’r peiriant twll yn y wal.

Dywedodd y Swyddog Diogelu Rhag Camddefnyddio Ariannol, Ditectif Michelle Shirley: "Gall twyll negeseuwyr fod yn anodd ei weld, yn enwedig os ydych yn cael eich rhoi o dan bwysau ac ein bod yn siarad â swyddog banc mewn sefyllfa o argyfwng.

"Mae twyllwyr yn gallu dynwared rhifau ffôn gan roi'r argraff mai eich banc sy'n cysylltu â chi, ac mae'n bosib eu bod yn gwybod pethau personol amdanoch, a dyna sut maent yn eich argyhoeddi chi i ymddiried ynddynt.

"Mae'n bwysig cofio mai chi sydd biau eich cerdyn debyd a chredyd ac ni ddylech ei roi i neb arall.

"Os yw rhywun yn dweud bod angen ei gasglu gan negesydd neu os yw rhywun yn gofyn i chi ei anfon drwy'r post, mwy na thebyg twyll ydyw a dylech orffen yr alwad ar unwaith." 

Ni fydd eich banc byth yn gofyn i chi am eich PIN llawn neu eich cyfrinair, nac yn anfon rhywun i'ch cartref i gasglu arian, PIN, cardiau neu lyfrau siec.

Am fwy o wybodaeth a help neu os ydych am  riportio hwn a mathau eraill o dwyll, ewch at Action Fraud  - y ganolfan riportio twyll a seibrdrosedd cenedlaethol neu gallwch ei riportio yn uniongyrchol i Heddlu Gogledd Cymru.