Digwyddiad Rhwydwaith Heddlu LDHT+ Cymru

Cynhaliwyd cyfarfod cyffredinol blynyddol Rhwydwaith Heddlu LDHT+ Cymru ym Mangor yr wythnos ddiwethaf.

Mewn partneriaeth â Phrifysgol Bangor, daeth y digwyddiad â phedair cangen rhwydwaith staff cymorth LHDT+ Heddlu Cymru at ei gilydd. Trafodwyd cynnydd y rhwydwaith a blaenoriaethau arfaethedig y flwyddyn i ddod. Roedd yn gyfle gwych i aelodau a chynghreiriad y rhwydwaith LHDT+ ddysgu mwy am y rhwydwaith, datblygiad aelodau a chyfleoedd rhwydweithio.

Agorwyd y digwyddiad, a gynhaliwyd ar ddydd Mercher 30 Mehefin gan y Prif Gwnstabl Amanda Blakeman. Dilynwyd hyn gan sawl siaradwr gwadd o bedwar heddlu Cymru ynghyd â GISDA sy'n rhoi cymorth a chyfleoedd i bobl ifanc fregus yng Ngwynedd. Canolbwyntiodd hefyd ar sawl maes penodol fel y diwylliant a brofir gan swyddogion a staff LHDT+ yng Nghymru a blaenoriaethau'r rhwydwaith at y dyfodol. Gwelwyd uchafbwyntiau o Gynhadledd LHDTIQ+ y Byd 2023 yn Awstralia.

Roedd y digwyddiad hefyd yn cynnwys cyflwyno Gwobr Rhagoriaeth Rhwydwaith Heddlu LDHT+ Cymru a aeth i'r SCCH Connor Freel o Heddlu Gogledd Cymru, sy'n gweithio yn ardal De Sir y Fflint.  Ynghyd â'i rôl fel SCCH, mae Connor yn gwirfoddoli fel Cyswllt Cymorth Staff LHDT+ ac mae wedi bod yn hanfodol wrth gynorthwyo'r gymuned LHDT+ y tu mewn a thu allan i'r heddlu.

Fel swyddog trasryweddol, mae Connor yn treulio llawer o'i amser sbâr yn cydweithredu gyda'r gymuned er mwyn sefyll dros y bobl hynny sy'n cael eu niweidio ac yn profi gwahaniaethu. Ers ymuno â Heddlu Gogledd Cymru yn 2015, mae wedi gweithio'n galed er mwyn ymdrin â'r materion hyn drwy gynorthwyo hyfforddiant a datblygiad swyddogion a staff heddlu o ran cydraddoldeb a materion trawsryweddol yn benodol. Mae wedi cydweithio ar gynnwys hyfforddiant i swyddogion ynghylch ymdrin â dioddefwyr trosedd trawsryweddol. Mae wedi darlithio ym Mhrifysgol Glyndŵr Wrecsam am gydraddoldeb, amrywiaeth ac agweddau cynhwysiant a chymdeithasol. 

Dywedodd Connor: “Rwyf yn falch iawn o fod yn rhan o'r gwaith gwych sy'n cael ei wneud gan Rwydwaith Heddlu LDHT+ Cymru ⁠er mwyn hyrwyddo, cynorthwyo ac annog newidiadau cadarnhaol ar gyfer ein staff a swyddogion LDHT+ ledled heddluoedd yng Nghymru.

“Gyda'n gilydd, rydym yn ei defnyddio ein gwybodaeth, profiad ac angerdd er mwyn cymell newid i roi'r cyfle i'n staff fod y fersiwn gorau o'u hunain y gallent fod. Mae hyn yn troi'n sgiliau i'w rolau unigol er mwyn gwasanaethu'r cymunedau y gwnaethom ymuno â'r heddlu i'w gwarchod orau.

“Mae'n fraint gen i dderbyn y wobr hon. Rwyf yn ddiolchgar am gymorth, cyngor ac anogaeth fy nghydweithwyr gwych o fewn y rhwydwaith a'm teulu plismona ehangach. Heb hyn, ni fyddai'r cyfle hwn i godi ymwybyddiaeth yn bosibl."

Dywedodd y Prif Gwnstabl Blakeman: "Mae'r gwerth mae Connor yn dod i blismona nid yn unig yn cynnwys y cyngor, arweiniad a'r cymorth mae'n ei roi i unigolion a'r sefydliad, ond mae ei natur fentrus ac ansawdd ei waith yn sefyll allan. Mae'n gaffaeliad gwirioneddol i'r Gwasanaeth Heddlu ac i Rwydwaith LHDT+ yr Heddlu. Mae'n haeddu'r gydnabyddiaeth hon o'i werth i'r rhwydwaith."

Dywedodd Julie Brierley, Pennaeth Dysgu a Datblygu a Chyd-gadeirydd Rhwydwaith Heddlu LHDT+ Cymru: "Mae'n fraint gen i fod yn Gyd-gadeirydd Rhwydwaith Heddlu LDHT+ Cymru am y 2 flynedd ddiwethaf a chydweithredu gyda'r Arolygydd Ian Roberts a chyd-gadeiryddion eraill er mwyn cynorthwyo aelodau'r rhwydwaith a'n cydweithwyr.

“Gyda'n gilydd, gallwn chwyddo lleisiau cydweithwyr LHDT+ a rhoi man diogel i wrando ar unrhyw syniadau a heriau ar gyfer creu amgylchfyd cynhwysol.

“Rwyf yn edrych ymlaen at y rhwydweithio parhaus ledled yr heddluoedd er mwyn cyfrannu tuag at ddod yn weithle cynhwysol i'n holl bobl."

Beth ydy Rhwydwaith LHDT+ Heddlu Cymru?

Mae Rhwydwaith LHDT+ Heddlu Cymru yn gymdeithas gymorth ar y cyd â Heddluoedd De Cymru, Gwent a Dyfed Powys. Perwyl y rhwydwaith ydy sicrhau fod gwasanaethau heddlu ac asiantaethau trosedd eraill yn hyrwyddo cynhwysiant a chyfle cyfartal i'n staff LHDT+ wrth weithio tuag at sefydliad sy'n adlewyrchu ein cymunedau amrywiol. 

Nod y rhwydwaith ydy creu a rhannu arfer gorau, hyfforddiant a chyfleoedd am ddigwyddiadau ledled y wlad a herio sefydliadau ledled Cymru a'r DU i wella profiadau pobl LHDT+, gyda'n gilydd.   

Ei brif nod ydy cyflawni amgylchfyd gweithio sy'n rhydd o wahaniaethu, aflonyddu a thargedu uniongyrchol ac anuniongyrchol ar ffurf homoffobia, deuffobia a thrawsffobia. Rydym yn bwriadu cyflawni hyn drwy:

• Creu cyfleoedd cyfartal i weithwyr heddlu LHDT+ o fewn bob agwedd o blismona
• Cynnig cymorth a chyngor i weithwyr heddlu LHDT+ a chynorthwyo heddluoedd gyda datblygu polisi
• Gweithio tuag at berthynas well rhwng yr heddlu a chymunedau LHDT+ yng Nghymru
• Mynd ati i gyfranogi mewn ymdrechion cenedlaethol drwy ein hymgysylltiad gyda Rhwydwaith LHDT+ Cenedlaethol yr Heddlu
• Trefnu a mynychu digwyddiadau LHDT+ ledled Cymru a'r DU

Cydnabyddir a chynorthwyir Rhwydwaith Heddlu LDHT+ Cymru gan brif swyddogion ledled Cymru. Fe'i llywodraethir gan gyfansoddiad, sy'n cyfarwyddo ei weithgarwch a'i gyfrifoldebau'n glir.

Gallwch ddal i fyny gyda hynt Rhwydwaith Heddlu LHDT+ Cymru drwy eu dilyn ar Twitter – @LGBTPoliceWales