Heddlu Gogledd Cymru yn ennill Cynghrair Bêl Droed Gwasanaethau Brys y DU

Enillodd tîm pêl droed dynion Heddlu Gogledd Cymru ei bencampwriaeth cynghrair genedlaethol am y tro cyntaf dros y penwythnos.

Ar ddydd Sul 4 Mehefin, fe wynebodd swyddogion oddi ar ddyletswydd HGC swyddogion o Heddlu Dyffryn Tafwys yng ngêm derfynol Cynghrair Bêl Droed y Gwasanaethau Brys yn Stadiwm Broadhurst Park FC United of Manchester.

Profodd ergyd gampus gan PC Toby Jones hanner ffordd drwy'r ail hanner yn dyngedfennol i HGC, a wnaeth selio buddugoliaeth 1-0 ar y diwrnod. 

Dywedodd Adam Bailey, hyfforddwr HGC: "Cynghrair Gwasanaethau Brys y DU ydy'r gystadleuaeth fwyaf y gallem ei hennill. Mae'n cynnwys timau o'r gwasanaeth ambiwlans, y gwasanaeth tân a'r gwasanaeth carchardai. Felly mae bod yn fuddugol yn y tymor cyntaf wnaethom ei chwarae yn orchest wych i bawb a gymerodd ran."

Mae tîm Gogledd Cymru bellach yn anelu ennill mwy o dlysau. Byddant yn wynebu Heddlu De Cymru yng ngêm derfynol Cwpan Heddluoedd Cymru'r wythnos nesaf.

Mae timau pêl droed yr heddlu, sydd hefyd yn cynnwys tîm merched, ymysg llawer sy'n derbyn cefnogaeth Cymdeithas Chwaraeon HGC.

Yn cael ei gynnal gan swyddogion a staff yr heddlu, mae pob gweithiwr HGC (yn gwasanaethu neu wedi ymddeol) yn gymwys i ymuno.

Mae manteision ymaelodi yn cynnwys:

• Gwell ffordd o fyw a ffitrwydd
• Iechyd meddwl gwell
• Ymdeimlad o falchder a chyflawniad
• Gwaith tîm a chyfeillach tu allan i'r swyddfa
• Cyfleoedd i rwydweithio
• Arbedion ariannol

Os oes gennych ddiddordeb mewn dilyn rôl gyda Heddlu Gogledd Cymru, ewch ar ein  tudalen recriwtio er mwyn gweld ein swyddi gwag ar hyn o bryd.