Heddlu Gogledd Cymru yn annog y cyhoeddi i feddwl am 'Ddeialu Poced'

Mae Heddlu Gogledd Cymru yn rhybuddio'r cyhoedd i fod yn wyliadwrus rhag gwneud galwadau brys ar ddamwain.

Yn dilyn cynnydd mewn 'galwadau 999 distaw' mae Heddlu Gogledd Cymru yn annog y cyhoedd i wirio gosodiadau 'galwadau brys' ar eu ffonau symudol er mwyn osgoi galwadau diangen i Ganolfan Rheoli'r Heddlu.

Galwadau brys yw ‘galwadau 999 distaw’ lle nad oes neb yn siarad ac, o bosib wedi ei wneud ar ddamwain drwy 'ddeialu poced'. Gall y galwadau hyn gymryd tipyn o amser i staff gysylltu yn ôl â'r galwr er mwyn sicrhau nad oes angen help arnynt.

Dywedodd yr Arolygydd Jon Aspinall: "Mae'r nifer o alwadau 999 damweiniol wedi cynyddu yn sylweddol. Hoffwn annog pawb i wirio eu gosodiadau argyfwng ar eu ffonau symudol a'u newid er mwyn atal mwy o alwadau damweiniol i'r gwasanaethau brys.

Rydym yn gweithio'n agos gyda gwneuthurwyr ffonau symudol i ddatrys y broblem ond yn y cyfamser bydd newid eich gosodiadau yn sicrhau nad ydych yn galw 999 yn ddamweiniol. Os oes gennych unrhyw broblemau yn newid eich gosodiadau, cysylltwch â’ch darparwr rhwydwaith neu ewch ar y we i gael gwybod sut i newid y gosodiadau ar eich ffôn.

Ein blaenoriaeth yw rhoi gwasanaeth ar unwaith i rai mewn angen felly dilynwch yr arweiniad hwn a'i rannu gyda'ch teulu a'ch ffrindiau fel y gallwn roi'r gwasanaeth gorau posib i'r rhai mewn angen."

Dyma rhai awgrymiadau ar sut y gallwch leihau galwadau 999 damweiniol:

• Cadwch eich ffôn allan o afael plant
• Clowch eich ffôn cyn ei roi yn eich poced neu eich bag

Os byddwch yn deialu 999 ar ddamwain, dywedwch wrth yr un sy'n ateb y ffôn mai camgymeriad ydyw ac nad ydych angen cymorth.