Ymgyrch digynsail cenedlaethol yn arwain at atafaelu gwerthu £130M o ganabis

Ar raddfa sydd erioed wedi cael ei weld o’r blaen, mae heddluoedd ar draws Cymru a Lloegr wedi cydlynu miloedd o gyrchoedd cyffuriau yn erbyn Grwpiau Troseddau Trefnedig (OCG), gan arestio cannoedd o bobl ac atafaelu drylliau tanio, swm enfawr o arian a phlanhigion canabis gwerth oddeutu £115 a £130 miliwn.

Drwy gydol mis Mehefin, bu heddluoedd yn chwilio ac yn darganfod ffatrïoedd canabis enfawr yn yr ymgyrch genedlaethol fwyaf o’i bath yn y DU, wedi’i anelu at dargedu grwpiau troseddau trefnedig a’u ffynonellau incwm anghyfreithlon.

Cafodd rhwydweithiau troseddol sy'n ymwneud â gwerthu cyffuriau, troseddau mewnfudo a gwyngalchu arian eu targedu gan yr heddlu ac asiantaethau partner fel rhan o Ymgyrch Millie, pan wnaeth heddluoedd ganolbwyntio adnoddau ar fynd i’r afael â thyfu canabis ar raddfa fawr – ffynhonnell allweddol o incwm anghyfreithlon ar gyfer gangiau trefnedig.

Yng Ngogledd Cymru cyflawnwyd y canlynol:

• 14 gwarant wedi’i gweithredu ar draws Gogledd Cymru
• 20 wedi’i harestio (cafwyd 12 ohonynt eu cadw yn y ddalfa)
• Bron i 4,000 o blanhigion canabis wedi’i hatafaelu
• Atafaelu ffonau symudol ac arian parod

Mae'r cysylltiadau rhwng troseddau difrifol a'r rhai sy'n ymwneud â thyfu canabis yn glir, gyda'r fasnach gyffuriau yn hybu trais gan gangiau wrth i grwpiau gystadlu am diriogaeth a cheisio mynd ar drywydd eu cystadleuwyr.

Cynhaliwyd Ymgyrch Mille ar draws y 43 heddlu yng Nghymru a Lloegr, gan weithio gyda’r Uned Troseddau Trefnedig Rhanbarthol a phartneriaid, er mwyn targedu’r gangiau troseddol sydd ynghlwm â chynhyrchu canabis a throseddu difrifol.

Meddai Chris Allsop, Prif Gwnstabl Cynorthwyol Heddlu Gogledd Cymru: “Rydym wedi gweithio'n agos gyda'r rhwydwaith plismona cenedlaethol i dargedu a tharfu ar gynhyrchu canabis cyfundrefnol yn ein rhanbarth.

“Ni fydd y math yma o droseddu yn cael ei oddef, felly drwy adnabod, targedu a datgymalu ffatrïoedd canabis mawr, rydym yn gallu atal troseddu mwy difrifol, a gwarchod y rhai hynny sy’n fregus ac mewn peryg o gael eu hecsbloetio.

“Mae ein gwaith yn taclo’r math yma o droseddu yn ddibynnol ar cael gwybodaeth gan y cyhoedd, nhw yn aml yw’r rhai cyntaf i sylweddoli ar ymddygiad amheus yn eu cymunedau. Rydym eisiau clywed gan unrhyw un sy’n gweld ymddygiad anarferol – ma hwn hefyd yn cynnwys perchnogion busnes gan bod ffatrïoedd canabis yn gallu cael eu sefydlu mewn unedau diwydiannol a siopau gwag.

“Mae ffatrïoedd canabis yn peryglu’r cyhoedd. Mae’r ynni sydd ei angen ar gyfer tyfu planhigion yn golygu bod troseddwyr yn dargyfeirio’r cyflenwad trydan er mwyn osgoi talu. Mae hwn yn beryglus oherwydd risg tân i’r rhai sy’n cael eu gorfodi i fyw a gweithio yno, a hefyd yn peryglu aelodau o’r cyhoedd mewn adeiladau cyfagos.

“Mae’r math hwn o ymgyrch wedi gweld ymdrech enfawr o gydweithio gan y lluoedd rhanbarthol sy’n benderfynol nad oes lle i gyffuriau yn y Gogledd Orllewin, ac mi fydd y gwaith yma yn parhau.”

Dylai unrhyw un sydd â gwybodaeth am ffatri ganabis posib neu am werthu cyffuriau gysylltu â Heddlu Gogledd Cymru ar-lein neu drwy ffonio 101.

Gall pobl hefyd gysylltu â Crimestoppers, yn ddienw, ar 0800 555 111 neu drwy crimestoppers-uk.org

Mae’r canlyniadau cenedlaethol ar gyfer Ymgyrch Mille fel y canlynol:

• 1,013 gwarant
• Atafaelu 182,422 o blanhigion canabis, gwerth oddeutu £115 - £130 miliwn
• Arestio 967 am droseddau gan gynnwys tyfu canabis, gwyngalchu arian a throseddau arfau
• Atafaelu 20 o ddrylliau tanio
• Atafaelu £636,000 mewn arian parod
• Atafaelu 26 kilogram o gocên, gwerth hyd at £1 miliwn ar y stryd

Dyma rai arwyddion allweddol sy’n dangos y gallai eiddo fod yn cael ei ddefnyddio fel ffatri ganabis:

• Pobl yn ymweld yn aml â’r eiddo yn ystod oriau anghymdeithasol drwy gydol y dydd a'r nos.
• Ffenestri wedi’u duo, neu anwedd ar y ffenestri, hyd yn oed pan nad yw'n oer y tu allan.
• Goleuadau llachar mewn ystafelloedd trwy gydol y nos.
• Mesuryddion trydan yn cael eu hymyrryd â nhw/ eu newid â chebl newydd, weithiai’n arwain at oleuadau stryd. Gall biliau trydan uchel hefyd fod yn arwydd.
• Arogl cryf, unigryw, melys, a sŵn gwyntyllion.
• Llawer o waith yn digwydd neu gyfarpar yn cael ei ddanfon at yr eiddo, fel gwresogyddion a goleuadau, yn enwedig offer sy'n gysylltiedig â thyfu planhigion dan do heb bridd.
• Gormodedd o botiau planhigion, cemegau, gwrtaith, a chompost.