Carcharwyd cyn-arweinydd ieuenctid am droseddau rhyw hanesyddol yn erbyn dau fachgen ifanc

Carcharwyd cyn-arweinydd ieuenctid 73 oed heddiw am fwy na 10 mlynedd am droseddau rhyw hanesyddol yn erbyn dau fachgen ifanc. 

Ymddangosodd Paul James Vaughan o Emlyn Grove, y Rhyl yn Llys y Goron yr Wyddgrug heddiw yn dilyn dedfryd am nifer o droseddau yn dyddio o 1977 i 1984 yn ystod ei gyfnod fel arweinydd ieuenctid yn y Rhyl.

Plediodd yn euog i ddau gyhuddiad o ymosod yn anweddus ar ddau fachgen a dau gyhuddiad o ymddygiad anweddus gyda phlentyn.

Dedfrydwyd Vaughan i gyfanswm o ddeng mlynedd a chwe mis o garchar a rhaid iddo gofrestru fel troseddwr rhyw am oes. Cafodd hefyd ei wahardd rhag gweithio gyda phlant neu oedolion am gyfnod amhenodol.

Dywedodd y Swyddog Ymchwilio, Ditectif Gwnstabl Gemma Smith: “Mae Paul Vaughan yn ddyn peryglus a wnaeth ddefnyddio ei safle o ymddiriedaeth i gam-drin bechgyn ifanc yn ei ofal.

"Mae cam-drin rhywiol yn niweidiol iawn ac yn cael effaith andwyol ar y plant sy'n parhau i ddioddef drwy gydol eu bywydau.

“Dw i'n cymeradwyo dewrder y dioddefwyr sydd wedi siarad allan ar ôl 40 blynedd. Maent wedi dangos dewrder a nerth drwyddi draw. Gobeithio y byddant yn gallu canolbwyntio ar symud ymlaen gyda'u bywydau gan wybod bod yr un a wnaeth eu cam-drin nawr yn talu am ei droseddau.

“Rwyf yn annog pawb sydd wedi cael eu cam-drin i ddod ymlaen gan wybod y byddwn yn gwneud popeth i erlid troseddwyr a diogelu pobl fwyaf bregus yn ein cymdeithas."

Gallwch ymweld â'n gwefan yma i gael rhagor o wybodaeth am sut i ofyn am gymorth a chefnogaeth - Treisio, ymosod rhywiol a throseddau rhywiol eraill | Heddlu Gogledd Cymru (northwales.police.uk)