Ffigyrau byrgleriaethau preswyl yn parhau i ostwng ledled gogledd Cymru

Mae'r nifer o fyrgleriaethau preswyl wedi parhau i ostwng yng ngogledd Cymru, yn ôl y ffigyrau diweddaraf sydd ar gael.

Gwelwyd gostyngiad yn y nifer o 'Fyrgleriaethau Preswyl' yn ystod y pandemig Covid gyda mwy o bobl yn gweithio o'r cartref a llai o 'droseddoldeb teithiol'. Mae'r troseddau hyn yn cynnwys byrgleriaethau yn y cartref, tai gwag a thai allan fel siediau a garejys. 

Mae'r gostyngiad mewn troseddau wedi parhau dros y 12 mis diwethaf er codi cyfyngiadau. Hyd yma, mae 10% yn llai o fyrgleriaethau preswyl nag yn ystod yr un cyfnod llynedd sy'n cyfateb i 128 yn llai o ddioddefwyr trosedd.

Wrth wneud sylwadau ar y ffigyrau diweddaraf, dywedodd y Prif Uwcharolygydd Sian Beck o'r Gwasanaethau Plismona Lleol: "Mae dioddef byrgleriaeth yn eich cartref yn ymyriad personol. Rydym yn deall yr effaith sylweddol mae hyn yn ei gael ar ddioddefwyr ar droseddau o'r fath.

⁠"Mae ein swyddogion wedi bod yn gweithio'n galed o fewn ein cymunedau er mwyn mynd ati i leihau'r math hwn o drosedd, drwy ymweld â thrigolion bregus ac eiddo cyfagos. Mae hyn er mwyn eu gwneud yn ymwybodol o'r bygythiadau, ynghyd a'u cynorthwyo i wneud eu heiddo’n llai deniadol i droseddwyr.

"Rydym yn sylweddoli ein bod angen parhau gyda'r patrwm presennol o ddod â mwy o droseddwyr byrgleriaethau o flaen eu gwell. Fel rhan o'n perwyl i wneud gogledd Cymru'r lle mwyaf diogel i fyw, gweithio ac ymweld yn y DU, bydd ein Prif Gwnstabl newydd yn lansio menter 'Dangos y Drws i Drosedd' newydd. Bydd hyn er mwyn lleihau troseddau caffael ymhellach a gwella diogelwch yn ein cymunedau."

Dywedodd y Prif Arolygydd Helen Douglas, sy'n arwain y fenter ar ran y Prif Gwnstabl: "Ein menter 'Dangos y Drws i Drosedd' ydy ein hymdriniaeth tuag at droseddau caffael fel byrgleriaeth, lladrad a throseddau cerbydau, gan dargedu'r rhai hynny sy'n cyflawni'r troseddau hyn. 

"Fe wnawn ddarparu strategaethau atal trosedd profedig a thystiolaeth i gymunedau a busnesau, gan wella diogelwch er mwyn atal trosedd pellach. Fe wnawn gydweithredu'n agos gyda mân-werthwyr er mwyn eu dangos sut i gydnabod nwyddau wedi'u dwyn ac atal troseddwyr rhag elwa o eiddo wedi'u dwyn. 

"Fe wnawn hyfforddi busnesau a phartneriaid i fod yn 'llygaid a chlustiau' i ni, gan egluro arwyddion troseddau trefnedig, camfanteisio troseddol a sut i'n hysbysu ni am hyn. Fe wnawn ddod a throseddwyr o flaen eu gwell, eu dal wrth iddynt weithredu wrth ddefnyddio asedau cudd, technoleg fforensig a thactegau arloesol."