Arestiadau cyntaf Ymgyrch Atal Yfed a Gyrru a Gyrru ar Gyffuriau

Mae dros 25 o arestiadau wedi cael eu gwneud gan swyddogion fel rhan o'r Ymgyrch Atal Yfed a Gyrru a Gyrru ar Gyffuriau’r Nadolig.

Ers cychwyn yr ymgyrch ar 1 Rhagfyr mae 10 o arestiadau yfed a gyrru a 18 o arestiadau am yrru ar gyffuriau wedi’u gwneud ar draws y rhanbarth.

Bydd sawl o’r rhai a gafodd eu harestio ar amheuaeth o yfed a gyrru yn ymddangos o flaen y llys cyn y Nadolig ac maent yn wynebu’r posibilrwydd o golli eu trwydded gyrru a derbyn dirwy.

Lefel alcohol uchaf yr ymgyrch hyd yn hyn ydy 97 (35 ydy’r terfyn cyfreithiol) lle cafodd dyn 32 oed ei arestio yng Nghei Connah ar 2 Rhagfyr. Mae’r dyn, sydd o’r ardal, eisoes wedi cael ei gyhuddo o yfed a gyrru ac mi fydd yn ymddangos o flaen Llys Ynadon yr Wyddgrug ar 21 Rhagfyr.

Mae’r rhai a gafodd eu harestio ar amheuaeth o yrru ar gyffuriau yn gorfod aros am ganlyniadau profion pellach cyn fydd penderfyniad am gyhuddo yn cael ei wneud. Gwnaeth y rhai a gafodd eu harestio roi profion positif am ganabis a chocên. Bu dau o’r rheini yn bositif am y ddau gyffur. Mae’r rhai a gafodd eu harestio rhwng 17 a 60 oed.

Dywedodd yr Uwcharolygydd Simon Barrasford: “Fe ddylai unrhyw un sy’n ystyried gyrru, tra byddant o dan ddylanwad alcohol neu gyffuriau, wybod y byddwn allan yn disgwyl amdanynt.

“Mae Heddlu Gogledd Cymru wedi ymrwymo’n llwyr ceisio cadw’r ffyrdd yn saffach a thargedu’r rhai hynny sy’n peryglu bywydau eu hunain a bywydau pobl eraill.”

“’Da ni wedi ymrwymo gwneud y ffyrdd yn saffach i bawb a ‘da ni’n parhau targedu’r rhai sy’n peryglu bywyd eu hunain a phobl eraill.

“Bydd nifer yn mynychu partïon Nadolig y penwythnos yma a ‘da ni’n erfyn arnyn nhw wneud trefniadau i fynd adref yn ddiogel, ac hefyd eu hatgoffa nhw y gallent fod dros y terfyn cyfreithiol y bore wedyn.

“’Da ni eisiau i bawb fwynhau’r cyfnod ac mae hwn yn un o’n hymgyrchoedd pwysicaf. Er ein bod yn rhoi rhybuddion yn rheolaidd am beryglon gyrru o dan ddylanwad alcohol a chyffuriau, mae gormod yn parhau i gymryd y risg.”

Dywedodd Andy Dunbobbin, Comisiynydd Heddlu a Throsedd Gogledd Cymru: “Mae’r ymgyrch eleni wedi gweld dros 25 o arestiadau am yrru o dan ddylanwad alcohol a cyffuriau ar y ffyrdd, a hoffwn i longyfarch a chanmol y swyddogion am eu gwaith caled a’u dyfalbarhad.

“Fodd bynnag, mae’n hynod o siomedig fod rhai pobl yn dal i gymryd y risg o yfed a gyrru a gyrru ar gyffuriau. Mae diogelwch ar y ffyrdd yn bwysig iawn i mi a dwi eisiau gweld pawb yn cyrraedd adref yn ddiogel y Nadolig hwn. Os ydy rhywun yn meddwl mentro yfed a gyrru neu yrru ar gyffuriau, dwi’n erfyn arnyn nhw ail feddwl. Nid yn unig maen nhw’n torri’r gyfraith ond maen nhw’n peryglu eu hunain a phobl eraill. Mae swyddogion yn barod i’w stopio nhw a stopio pobl rhag gyrru o dan ddylanwad a dwi’n gobeithio bydd ymgyrch hysbysebu’r heddlu yn atgyfnerthu’r neges hon.”

Mae Heddlu Gogledd Cymru’n defnyddio’r cyfryngau cymdeithasol ynghyd â hysbysebu digidol er mwyn lledaenu’r neges am effaith yfed a gyrru a gyrru ar gyffuriau. Mae hyn yn cynnwys fan hysbysebu ddigidol sy’n teithio ar draws Gogledd Cymru ar ddyddiau allweddol drwy gydol mis Rhagfyr, a hysbysfyrddau digidol mewn canolfannau siopa ym Mangor, Bae Colwyn, y Rhyl a Wrecsam sydd yn dangos negeseuon drwy gydol yr ymgyrch. Mae posteri hefyd yn cael eu dosbarthu o amgylch tafarndai, ysgolion uwchradd a cholegau.

Dilynwch yr ymgyrch ar y cyfryngau cymdeithasol drwy ddilyn yr hashnodau #5Angheuol ac #OpLimit.

Os ‘da chi’n amau bod rhywun yn gyrru pan na ddylent wneud hynny, riportiwch i’r heddlu drwy ffonio 101 (neu ffoniwch 999 os ydy’r perygl ar fin digwydd) neu ffoniwch Crimestoppers yn ddienw ar 0800 555 111.