Ci Chwilio Man a Lle Trosedd Rhywiol Newydd yn cyflwyno sgiliau unigryw i Uned Heddlu

Mae Uned Gŵn Cynghrair Heddluoedd Swydd Gaer a Gogledd Cymru wedi croesawu April y ci heddlu yn dilyn cwblhau rhaglen hyfforddiant lem am chwe wythnos sydd wedi newid y ffordd mae troseddau rhywiol yn cael eu hymchwilio.

Wedi llwyddo cymhwyso fel ci chwilio man a lle trosedd rywiol, gyda chymorth ei thriniwr PC Steve Gunn, mae April bellach yn un ond tri chi yn y DU sydd wedi'i hyfforddi i ganfod hylif semen yn unig, a wnaiff gynorthwyo i roi mwy o droseddwyr rhywiol yn y carchar.

Mae'r hyfforddiant yn rhan o brosiect cŵn chwilio fforensig hynod lwyddiannus, wedi'i arloesi gan Heddlu Swydd Derby a'i ddatblygu gan ei adran gŵn ac Ymchwilwyr Mannau a Lleoedd Trosedd. 

Mae April, sy'n Labrador Melyn 15 mis oed, rŵan yn gallu dod o hyd i hylif semen bach heb gael eu denu gan drywyddion eraill.  Mae ei thrwyn mor fain y gall ddod o hyd i 0.016ml o semen, weithiau flynyddoedd ar ôl iddo gael ei ollwng.

O fewn 36 awr o ddychwelyd o'u hyfforddiant, rhoddwyd PC Gunn ac April ar brawf ar ôl cael cais i gynorthwyo gydag archwilio man a lle yn Swydd Gaer.Roedd yn dilyn honiad o ymosodiad rhywiol ar ferch ifanc. 

Dywedodd y Prif Arolygydd Simon Newell, Pennaeth Plismona Cynghrair sy'n gyfrifol am Blismona Arfog a Chŵn Heddlu Swydd Gaer a Gogledd Cymru: "Mae hon yn enghraifft gynnar o sut bydd cyplysu April a PC Steve Gunn yn gaffaeliad mawr i'r Gynghrair. Bydd yn cynorthwyo Swydd Gaer a Gogledd Cymru erlyn rheibwyr rhywiol a diogelu dioddefwyr.  

"Mae'n dangos sut mae sgiliau'r cŵn a'u trinwyr yn chwarae rôl hynod bwysig yn ystod ymchwiliadau i droseddau rhywiol, mewn mannau lle na fyddai dulliau traddodiadol yn gweithio. 

"Mae cyflwyno'r gallu arbenigol yma gan gi chwilio o fewn y Gynghrair yn rhoi cyfleoedd cyffrous i ddangos sut allwn ni gyfrannu tuag at ymdrin â blaenoriaethau'r Heddlu."

Mae Uned Gŵn y Gynghrair, a sefydlwyd yn 2015, yn rhoi'r gallu i ymateb yn ddynamig i ddigwyddiadau sydd angen ymateb gan gŵn heddlu ledled Swydd Gaer a Gogledd Cymru. 

Dywedodd PC Dean Allen, prif hyfforddwr Swydd Derby: "Mae'n wych croesawu April i'r tîm.  Mae eu hyfforddiant fel cŵn hylif semen wedi bod yn hynod drwyadl er mwyn profi eu gallu fel y gallent gynorthwyo Ymchwilwyr Mannau a Lleoedd Trosedd.

"Yn y chwe wythnos diwethaf maent wedi dysgu nodi a chwilio am y trywydd mewn sawl senario rydym wedi'u creu ar eu cyfer: o dan do, yn yr awyr agored, mewn cerbydau, ar laswellt, tarmac, a deunyddiau fel dillad gwely a dillad.

"Y canlyniad ydy gallwn ddal troseddwyr rhywiol nad ydym fel arall wedi medru gwneud oherwydd natur anodd iawn rhai mannau a lleoedd troseddau rhywiol.

"Gall y cŵn nodi presenoldeb hylif semen mewn mannu lle na all citiau traddodiadol ddod o hyd iddynt. Unwaith maent wedi nodi'r trywydd, gellir anfon y darn hwnnw o ddeunydd neu lystyfiant a gellir cael proffil DNA. Bydd hyn yn arwain at fwy o erlyniadau a throseddwyr yn y carchar."