Ymestyn Gorchymyn Gwarchod Man Cyhoeddus ym Mangor

Penderfynwyd ymestyn Gorchymyn Gwarchod Man Cyhoeddus (PSPO) ar gyfer y Stryd Fawr Bangor am dair blynedd arall.

Cytunwyd rhwng Cyngor Gwynedd, Heddlu Gogledd Cymru ac asiantaethau partner bod angen i'r PSPO barhau yn yr ardal ac felly mae'r gorchymyn wedi cael ei ymestyn am 3 blynedd arall tan 30 Tachwedd 2025.

Mae'r gorchymyn yn hanfodol ar gyfer plismona'r Canol y Ddinas ac atal ymddygiad gwrthgymdeithasol. Ers ei osod yn 2019 mae wedi cael effaith bositif ar drigolion lleol a busnesau ar y Stryd Fawr a'r cyffiniau.

Amodau'r Gorchymyn yw na ddylai unigolion:

• Ymddwyn mewn modd sy'n debygol o achosi aflonyddu, dychryn, niwsans neu bryder
• Loetran yn feddw neu o dan ddylanwad cyffuriau
• Mae yfed alcohol neu fod â photeli neu ganiau o alcohol ar agor gyda'r tebygolrwydd o achosi ymddygiad gwrthgymdeithasol yn waharddedig yn yr ardal. Bydd cwnstabl neu SCCH yn gofyn i unrhyw un sy'n torri'r amod hwn i beidio ag yfed alcohol neu unrhyw beth maent yn tybio o fod yn alcohol ac ildio unrhyw beth yn eu heiddo sy'n alcohol
• Loetran o fewn 10 meter i unrhyw beiriant arian

Meddai Ditectif Gwnstabl Siwan Humphreys: “Mae Tîm Plismona’r ardal yn croesawu'r penderfyniad i ymestyn y PSPO am 3 blynedd arall. Bydd hyn yn cynorthwyo'r tîm wrth ymwneud ag unigolion sy'n ymddwyn mewn modd gwrthgymdeithasol parhaus ac sy'n cael effaith andwyol ar y gymuned.  

“Edrychwn ymlaen at barhau i weithio gyda'r Cyngor ac asiantaethau eraill i wneud Canol Dinas Bangor yn le croesawus i bawb sy'n ymweld, byw a gweithio yn y lle."

Mae torri'r PSPO yn drosedd a'r gosb yw Hysbysiad Cosb Benodol neu erlyn drwy'r Llys Ynadon.