Yr Heddlu yn ymgysylltu mwy gyda'r cyhoedd mewn gemau diweddar

Mae swyddogion heddlu Wrecsam wedi trefnu dwy gêm bêl-droed arall yn erbyn dau dîm sy'n cefnogi cynhwysiant ac amrywiaeth. 

Yn dilyn eu llwyddiant yn erbyn CPD Bellevue fel rhan o Wythnos Ffoaduriaid, aeth tîm Gorsaf Heddlu Wrecsam i Lannau Mersi yr wythnos wedyn.

Yn chwarae ar gaeau Target Football yn Admiral Street, Lerpwl, bu'r ymwelwyr yn chwarae yn erbyn Rainbow Toffees – Grŵp cefnogwyr LHDTC+ Everton.

Enillodd y tîm cartref 7-4 mewn gêm fywiog, gyda Neville Southhall, cyn ôl geidwad Everton a Chymru yn y dorf yn gwylio.

Mae Southall, sy'n llysgennad i'r gymuned LHDT yn cefnogi'r fenter ac wedi hyrwyddo'r gêm i'w ddilynwyr ar y cyfryngau cymdeithasol.

Mae’r Rhingyll Dave Smith, a sefydlodd dîm yr heddlu yn gynharach eleni, wrth ei fodd gyda'r cynnydd y mae ei swyddogion wedi gwneud hyd yn hyn.

Dywedodd: “Roedd hi'n wych cael cymryd rhan yn y gemau hyn yn erbyn timau sy'n gwneud cymaint o waith da o fewn eu cymunedau.

"Mae Bellevue yn glwb rydym yn ei adnabod yn dda. Mae eu cefnogaeth i ffoaduriaid a mewnfudwyr o fewn ardal Wrecsam yn enghraifft wych o safbwynt cynhwysiant a goddefgarwch.

“Mae Rainbow Toffees yn chwarae rhan fawr yn hyrwyddo cydraddoldeb ac yn ymdrechu i gael gwared o ragfarn yn ymwneud â materion LHDTC+.

“Roedd presenoldeb Big Nev yno yn cynorthwyo i ledaenu'r neges a diolch mawr iddo am ei gefnogaeth."

Roedd y neges yn glir i'r tîm o Wrecsam sydd wedi ymdrechu'n galed i ffurfio perthynas gref rhwng yr heddlu a'r gymuned.

Mae hyrwyddo cynhwysiant ac amrywiaeth wedi bod yn ganolog i ymdrechion ymgysylltu'r swyddogion ar ôl wynebu chwech tîm mewn gemau cyfeillgar a thwrnameintiau yn barod eleni.

Roedd wynebu tîm y tu allan i Gymru yn ddatblygiad pleserus arall i Ringyll Smith.

Ychwanegodd: “Roeddem yn falch o gael y cyfle i chwarae yn Lerpwl ddydd Sul.

"I ni, roedd yn gyfle i ledaenu ein neges hyd yn oed yn bellach wrth i ni edrych ar godi pontydd rhwng swyddogion heddlu a'r cyhoedd.

"Mae pêl droed yn gêm i bawb. Rydym yn credu fod ganddi'r grym i ddod a phobl yn nes at ei gilydd."

Atseiniwyd y teimladau hyn gan Paul Hession, Rheolwr Digwyddiadau Rainbow Toffees. Cyflwynwyd pennwn coffaol gan y swyddogion cyn dechrau'r gêm.

Gan drafod y gêm, dywedodd Paul: “Mae'r gemau hyn yn weithredaeth ar waith, sy'n gwella'r ddeialog ynghylch ymdrin a homoffobia a chasineb mewn pêl droed.

"Y neges ydy ei bod yn iawn bod yn aelod o'r gymuned LHDTQ+ a chwarae a chefnogi pêl droed."

Bydd CPD Gorsaf Heddlu Tref Wrecsam yn herio swyddogion o Wasanaeth Tân Gogledd Cymru yn eu gêm gyfeillgar nesaf.

Chwilir am leoliad ar gyfer y gêm ar hyn o bryd, gyda dyddiad ac amser eto i'w gadarnhau.

Os hoffai eich tîm cymunedol chwarae yn erbyn CPD Gorsaf Heddlu Wrecsam mewn gêm gyfeillgar, cysylltwch â: [email protected]