Ymosodiadau ar swyddogion Heddlu Gogledd Cymru

Mae nifer o swyddogion Heddlu Gogledd Cymru sy'n gweithio yn Rhanbarth y Dwyrain wedi dioddef trais dros y penwythnos.

Bu adroddiadau unwaith eto o ymosodiadau difrifol yn Wrecsam a Sir y Fflint ar swyddogion gwrywaidd a benywaidd.

Mae'r digwyddiadau hyn yn dilyn tuedd genedlaethol sydd wedi gweld cynnydd mewn ymosodiadau ar weithwyr brys yn ystod y blynyddoedd diwethaf.

Toc cyn 11pm neithiwr (6 Chwefror) derbyniwyd adroddiad o ddynion yn ymddwyn yn dreisgar yn nhafarn y Pentan yn yr Wyddgrug.

Ymosodwyd ar swyddogion a aeth yno i geisio dal yr un o dan amheuaeth o drais.

Cafodd un swyddog benywaidd ei chicio yn ei hwyneb a chafodd ei chleisio tra bu'r un o dan amheuaeth yn poeri ar y swyddog gwrywaidd.

Arestiwyd dyn 24 oed am ymosod ac am droseddau yn erbyn y drefn gyhoeddus.

Ar ddydd Gwener (4 Chwefror) clywodd swyddogion am ymladd rhwng dynion y tu allan i'r Hampden Arms yn Acrefair.

Wrth arestio dyn, cafodd swyddog ei daro yn ei wyneb a chafodd anafiadau i'w goesau o ganlyniad i'r ymosodiad.

Yn oriau mân fore dydd Sul (6 Chwefror), gwelwyd dyn yn achosi difrod troseddol ar Abbot Street yn Wrecsam a cheisiodd daro'r swyddog a oedd yn ei arestio gyda'i ben.

Wrth adlewyrchu ar benwythnos arall o ymosodiadau annerbyniol ar ei swyddogion, dywedodd yr Uwcharolygydd Nick Evans: “Nid yw'r digwyddiadau hyn yn anarferol, yn enwedig yn yr ardal hon, ac nid yw'n wahanol i unrhyw benwythnos arall.

"Roedd hwn yn benwythnos gweddol dawel mewn cyfnod tawel yn y flwyddyn. 

"Mae'r ymosodiadau hyn yn digwydd yn aml ac am y rheswm hwn mae'n bwysig ein bod yn atgoffa ein hunain ac eraill nad yw hyn yn rhan o'r swydd.

"Mae ymosod ar swyddog neu unrhyw weithiwr o'r gwasanaethau brys yn annerbyniol bob amser.

"Mae swyddogion yn wydn ac yn wynebu perygl a gwaith annifyr yn ddyddiol. Parhaodd y swyddogion i fod ar ddyletswydd drwy gydol y penwythnos ac nid ydynt yn mynd i gymryd seibiant cyn dychwelyd i'w shifft nesaf.

"Mae hwn yn rhywbeth dw i'n gweld yn gyson ac yn brawf o ymroddiad y swyddogion at wasanaethu'r cyhoedd.

"Serch hynny, dw i'n sicr y bydd y swyddogion hyn a'u teuluoedd yn fwy pryderus am eu diogelwch wrth fynd i'r gwaith yn y dyfodol. 

"Felly dw i'n apelio ar y cyhoedd i gefnogi swyddogion, staff a gwirfoddolwyr yr heddlu sy'n wynebu perygl o ddydd i ddydd er mwyn eich helpu chi.

"Ymunwch â mi yn herio unrhyw drais tuag at weithwyr y gwasanaethau brys, gan gofio mai'r "heddlu yw'r cyhoedd a'r cyhoedd yw'r heddlu".

Dywedodd Mark Jones, Ysgrifennydd a Thrysorydd Ffederasiwn Heddlu Gogledd Cymru hefyd:"Fel pob gwasanaeth brys arall, mae swyddogion heddlu yn gweithio bob dydd i helpu'r cyhoedd gan wynebu perygl pan fydd eraill yn rhedeg i ffwrdd.

"Pan fydd rhywun yn ymosod ar swyddog, aelod o staff neu wirfoddolwr yr heddlu wrth eu gwaith mae'n cael effaith andwyol.

“Mae'n ymosodiad ar y gymdeithas gyfan. Y tu ôl i'r lifrau mae bod dynol; mam, tad, mab, merch, brawd neu chwaer.

"Mae'r creithiau, yn gorfforol ac yn feddyliol yn gallu para am byth yn dilyn ymosodiad ac felly rydym yn mynnu bod y rhai sy'n gyfrifol yn cael dedfryd lem."