Mesurau diogelwch yn cynyddu ar safle rhandir yn dilyn cyfres o droseddau

Bydd mesurau diogelwch yn cynyddu ar safle rhandir yn Wrecsam yn dilyn cyfres o droseddau yn ddiweddar.

Mae'r rhandir Ffordd Erddig, sy'n cael ei redeg gan y Cyngor wedi cael ei dargedu fwy na dwsin o weithiau yn ystod y misoedd diwethaf gydag offer a llysiau yn cael eu dwyn, pob yn torri i mewn i siediau a difrod troseddol yn cael ei riportio.

O ganlyniad, mae camerâu CCC a golau ychwanegol wedi cael eu gosod yn y rhandir gyda larymau yn cael eu gosod ar siediau mewn ymgais i atal unrhyw droseddau pellach.

Bydd y cyngor hefyd yn paentio ffensys gyda phaen gwrth-fandaliaeth - paent trwchus, gludiog wedi ei gynllunio i ddiogelu eiddo rhag tresmaswyr - yn ogystal â chodi gatiau a ffensys uwch o gwmpas y safle.

Bydd brigau hefyd yn cael eu torri i atal pobl rhag dringo i mewn.

Ddoe, cynhaliwyd digwyddiad atal troseddau ar y safle gan SCCH John Davies ynghyd â swyddog rhandiroedd Cyngor Wrecsam, Nicola Ellis, a rhoddwyd larymau a chloeon i ddeiliad y rhandiroedd.

Dywedodd SCCH Davies: “Mae lladradau yn parhau i fod yn broblem yn rhandir Ffordd Erddig, a dyna pam rydym wedi bod yn gweithio gyda'r deiliaid er mwyn gwella ymwybyddiaeth ar y safle.

"Yn ystod Hydref a Thachwedd, derbyniwyd 14 adroddiad o ladradau a difrod troseddol ar y safle.

“O ganlyniad, bydd patrolau yn digwydd ar y safle yn rheolaidd, ddydd a nos.

“Bydd y troseddau hyn i weld yn rhai dibwys i rai ond rwyf yn ymwybodol o'r effaith y maent yn cael ar y deiliad, sy'n gweithio'n galed ar y safle.”

Cyngor ar atal troseddau 

Siediau a Thai Allan

• Gwnewch yn siŵr eu bod mewn cyflwr da a lleolwch nhw mewn lle amlwg.
• Defnyddiwch gloeon, drysau a cholynnau o safon uchel a chuddiwch pob ffenest.
• Defnyddiwch sgriwiau sy'n methu cael eu difa neu driliwch bennau sgriwiau allan.
• Marciwch eiddo yn amlwg a chofnodwch rifau cyfres am ddim ar  www.immobilise.com cofrestr eiddo cenedlaethol yr heddlu er mwyn adfer unrhyw eitemau wedi eu dwyn.
• Os nad ydych yn defnyddio unrhyw offer neu beiriannau yn rheolaidd - ewch â nhw adref.

Golau

• Gall rhandir wedi ei oleuo'n dda fod yn llai deniadol i ladron

Perimedr

• Gwiriwch bob ffens i sicrhau eu bod mewn cyflwr da. Dylai eich ffens fod yn 2 fetr o uchder heb unrhyw fylchau.
• Dylai gatiau fod wedi eu cloi yn ddiogel ac wedi eu cynllunio i fod yn anodd ei dringo.
• Sicrhewch nad oes biniau, biniau gwrtaith, coed neu wrychoedd o gwmpas sy'n hawdd i'w defnyddio i ddringo dros y ffens.
• Ystyriwch blannu gwrychoedd pigog ar yr ochr y tu mewn i'r ffens i atal pobl rhag dod i mewn.

Larymau

• Sicrhewch fod gweithdrefnau yn eu lle i ymateb yn gyflym i larwm.

Arwyddion

• Gosodwch arwyddion clir, gweladwy sy'n gallu gwrthsefyll y tywydd yn rhoi gwybod i bobl sy'n mynd heibio beth yw'r oriau agor, rheolau a manylion cyswllt. Gwnewch yn siŵr bod pob eiddo ar y safle wedi ei farcio,  rhowch wybod am gamerâu CCC a sut i riportio trosedd.