Motorists urged to stay safe on the roads

Mae Heddlu Gogledd Cymru yn annog modurwyr i fod yn ofalus ar y ffyrdd ar drothwy penwythnos Gŵyl y Banc.

Gyda'r disgwyl y bydd y ffyrdd yn prysuro wrth i bobl fwynhau penwythnos hir olaf yr haf, mae swyddogion yn annog pawb i gymryd gofal ychwanegol.

Dywedodd y Prif Arolygydd Jon Aspinall o Wasanaeth Cefnogaeth Gweithredol Heddlu Gogledd Cymru:  "Yn drist iawn rydym eisoes wedi gweld nifer o wrthdrawiadau angheuol a difrifol ar ffyrdd Gogledd Cymru.

“Rydym yn annog pobl i aros yn ddiogel dros Ŵyl y Banc, sy'n argoeli i fod yn un cynnes. Pan fydd y tywydd yn gynhesach, yn naturiol mae pobl am fwynhau eu hunain y tu allan. Mae hyn yn golygu mwy o draffig ar y ffyrdd - yn cynnwys beiciau modur.

"Rydym yn gwybod bod gyrwyr beiciau modur mewn mwy o beryg o gael eu lladd neu eu hanafu yn ddifrifol mewn gwrthdrawiadau traffig ffordd nag unrhyw un arall sy'n defnyddio'r ffordd, ac yn cynrychioli 1% o ddamweiniau traffig ffyrdd ond yn cynnwys 18% o farwolaethau. Felly ein neges ni yw mwynhewch eich rhyddid ar y ffyrdd yn ddiogel. Mae'n ardal wych i feicwyr, ac rydym eisiau iddynt allu mwynhau'r ardal yn ddiogel.

“Gofynnwn i feicwyr modur a gyrwyr ceir i fod yn ystyrlon ac i atgoffa pobl i feddwl am feicwyr. Dylai gyrwyr roi mwy o amser i feiciau modur a dylai gyrwyr beiciau modur sicrhau eu bod yn gyrru'n ddiogel heb gymryd risg diangen.

"Mae lleihau anafiadau ar ein ffyrdd yn parhau'n un o'n prif flaenoriaethau a rhaid i holl fodurwyr fod yn ymwybodol ein bod i gyd yn gwneud y gorau gallwn i sicrhau fod ein ffyrdd yn cael eu defnyddio'n ddiogel gan bawb. Mae ein timau Plismona Ffyrdd hwnt ac yma a byddant yn parhau i weithredu'n gadarn yn erbyn y rhai hynny i gyd sy'n beicio neu'n gyrru'n beryglus, yn goryrru, yn goddiweddyd ar linellau gwyn parhaus neu'n troseddu fel arall ar y ffyrdd."

Bydd patrolau yn parhau'r penwythnos hwn a hoffem atgoffa pawb fod cadw'n ddiogel ar y ffyrdd yn berthnasol i bob un ohonom, boed ar ddwy olwyn neu bedair. 

Yn ystod y tywydd poeth ni ddylai gyrwyr yrru neu reidio beic ar ôl yfed alcohol neu gymryd cyffuriau. Hyd yn hyn eleni mae Heddlu Gogledd Cymru wedi gwneud cannoedd o arestiadau am yrru dan ddylanwad alcohol a chyffuriau.

Ychwanegodd y Prif Arolygydd Aspinall:   “"Gall cymryd un cyfle pan ydych o dan ddylanwad alcohol neu gyffuriau fod yn ddinistriol i chi, eich anwyliaid a defnyddwyr eraill y ffyrdd. Cynlluniwch o flaen llaw a sicrhewch os ydych allan yn yfed, eich bod â ffordd ddiogel a dibynadwy o fynd adref."

Dylai unrhyw un gyda gwybodaeth o ran unigolion yn yfed a gyrru neu'n gyrru ar gyffuriau, neu a all fod yn cyflawni troseddau gyrru eraill, gysylltu â Heddlu Gogledd Cymru ar 101 neu Crimestoppers yn ddienw ar 0800 555 111.

Dyma gyngor i bawb sy'n gyrru:

• Yn ystod y tywydd poeth dylech yfed digon o ddŵr.  Gall syched effeithio ar eich gallu i ganolbwyntio gyda gyrwyr beiciau modur mewn peryg arbennig oherwydd eu bod yn gwisgo dillad trwm i'w diogelu. Sicrhewch eich bod yn cario digon o ddŵr gyda chi.
• Dylai unrhyw un sy'n mynd i farbeciw neu ymweld â thafarn wybod nad oes lefel 'ddiogel' o alcohol yn bodoli. Os ydych yn bwriadu mynd am ddiod, peidiwch â gyrru a threfnwch ffordd arall i fynd adref.
• Dylai pob gyrrwr wirio eu cerbydau cyn eu bod yn mynd ar y ffordd - mae swyddogion wedi stopio nifer o yrwyr gyda theiars diffygiol yn ddiweddar felly dylid gwneud y gwiriadau angenrheidiol. Mae hyn hefyd yn golygu gwirio'r olew, gan sicrhau bod digon o hylif i olchi'r sgrin flaen a bod pob golau yn gweithio'n iawn.