Wythnos Dwysáu Ymdrechion i Daclo Llinellau Cyffuriau

Gwnaed sawl arestiad ac atafaelwyd llawer iawn o arian parod, drylliau tanio a chyffuriau dosbarth A yr wythnos ddiwethaf wrth i Heddlu Gogledd Cymru gymryd rhan yn Wythnos Dwysáu Ymdrechion i Daclo Llinellau Cyffuriau. Roedd hon yn wythnos genedlaethol a oedd yn targedu gwerthwyr cyffuriau ledled y rhanbarth.

Roedd yr ymgyrch, a ddigwyddodd rhwng dydd Llun 11 Hydref a dydd Sul 17 Hydref, yn cynnwys gweithredu gwarantau ac ymgyrchoedd ar y cyd rhwng heddluoedd cyfagos gan gynnwys rhai Glannau Mersi a Manceinion Fwyaf.

Cynhaliwyd ymgyrch ar y cyd hefyd gyda'r Heddlu Trafnidiaeth Prydeinig, gan dargedu'r rhai hynny sy'n defnyddio'r rheilffordd i gludo cyffuriau i Ogledd Cymru.

Roedd uchafbwyntiau ledled yr heddlu yn cynnwys:

• Gweithredu 4 gwarant
• Arestio 7
• Wedi nodi unigolyn bregus, a fyddwn yn awr yn anelu i'w gwarchod rhag camfanteisio troseddol pellach
• Atafaelu 2 o ddrylliau tanio
• Datgelu cynaeafu canabis
• Atafaelu llawer iawn o arian parod a chyffuriau Dosbarth A a B

Dywedodd y Prif Uwcharolygydd Jason Devonport: "Yr wythnos ddiwethaf, roedd swyddogion mewn llecynnau ledled ardal yr heddlu er mwyn targedu unigolion a oedd â chysylltiad â gwerthu cyffuriau a chamfanteisio drwy Linellau Cyffuriau. Ymgymerwyd â stopio a chwilio a thactegau aflonyddu amlwg iawn.

"Mae gangiau Llinellau Cyffuriau'n camfanteisio'r bobl fwyaf bregus yn ein cymunedau, gan gynnwys plant a phobl ifanc, er mwyn cadw a gwerthu cyffuriau. 

"Maent yn cael eu dychryn, eu gorfodi, eu bygwth ac yn aml yn dioddef trais.

"O ganlyniad, mae ein swyddogion yn parhau'n gwbl ymroddedig i weithio gyda heddluoedd cyfagos er mwyn erlid troseddwyr a diogelu unigolion a all fod mewn perygl.

"Gyda'n gilydd gwnawn barhau i wneud Gogledd Cymru'n amgylchfyd digroeso i'r rhai hynny sy'n ceisio ymgysylltu mewn gweithgarwch troseddol."

Ers ei lansiad gwreiddiol ym mis Hydref 2018, mae Wythnos Dwysáu Ymdrechion i Daclo Llinellau Cyffuriau wedi gweld gweithredu uniongyrchol a chydlynol o ran troseddwyr llinellau cyffuriau, gyda'r nod o ddiogelu dioddefwyr.

Eleni, fe'i cynhaliwyd eto mewn partneriaeth gyda Chymdeithas y Plant a'u hymgyrch #LookCloser er mwyn adnabod arwyddion camfanteisio ymysg plant a phobl ifanc.

Dywedodd y Prif Gwnstabl Carl Foulkes: "Roedd yr wythnos yn llwyddiant mawr. Rwyf yn ddiolchgar am y gwaith mawr a aeth at gynnal yr wythnos hon gan staff a swyddogion yng Ngogledd Cymru a ledled y rhanbarth.

"Mae llawer iawn o arian parod a chyffuriau dosbarth A, ynghyd â dau ddryll tanio, oddi ar ein strydoedd. Mae hynny diolch i waith y rhai a oedd yn gysylltiedig.

"Ymlid y rhai hynny sy'n niweidio ein cymunedau ydy ein gwaith bob dydd. Byddwn yn parhau i ymlid y rhai hynny sy'n dosbarthu cyffuriau ddydd a nos.

"Os ydych yn cam-drin pobl fregus ac yn achosi trallod i'n cymunedau, dylech ddisgwyl gweithredu cadarn a di-baid gael eu cymryd yn eich erbyn. Mae cadw ein cymunedau'n ddiogel, ymlid troseddwyr, ac atal trosedd yn parhau i fod yn brif flaenoriaeth i ni."