Dedfrydu gyrrwr lori

Mae gyrrwr lori dan waharddiad a gafodd ei stopio ar yr A55 ar Ynys Môn wedi cael ei ddedfrydu.

Fe ymddangosodd Thomas Gallagher, 33 oed o Gelanmacha, Armagh, Gogledd Iwerddon o flaen Llys Ynadon Caernarfon ddoe (dydd Mawrth, 25 Mai) ar ôl pledio’n euog i droseddau gyrru.

Cafodd ei gyhuddo ar ôl cael ei stopio gan Uned Cerbydau Masnachol, Uned Plismona’r Ffyrdd toc ar ôl 11 o’r gloch nos Fawrth, y 15 Ebrill ar y bont pwyso yn Dalar Hir.

Fe wnaeth Gallagher, a oedd yn gyrru lori Scania coch, gyflwyno cerdyn trwydded gyrru ffug, ac ar ôl i swyddogion wneud gwiriadau cafodd ei adnabod a’i gadarnhau ei fod dan waharddiad.

Ar ôl gwiriadau pellach, ni wnaeth Gallagher ddarparu cofnod tacograff neu gerdyn gyrrwr ar gyfer Ymchwilydd Traffig y DVSA (Asiantaeth Safonau Gyrwyr a Cherbydau).

Cafodd ei arestio a’i gludo i’r ddalfa yng Nghaernarfon i gael ei gwestiynu.

Yn ddiweddarach cafodd Gallagher ei gyhuddo, a ddoe, bu ymddangos o flaen Llys Ynadon Caernarfon lle bu iddo bledio’n euog i yrru tra dan waharddiad, defnyddio offer ffug, methu a defnyddio tacograff a gyrru heb yswiriant.

Cafodd ei ddedfryd i:

• 26 wythnos o garchar, wedi’i ohirio am 18 mis
• Gwahardd rhag gyrru am 27 mis
• Talu dirwyon o £886
• Talu costau Gwasanaeth Erlyn y Goron o £85
• Talu costau dioddefwr o £128
• Gorfod gwneud 240 awr o waith di-dâl, i’w gwblhau o fewn 12 mis

Meddai PC Eifion Jones o Uned Cerbydau Masnachol Heddlu Gogledd Cymru: “Roedd Gallagher yn gwbl ymwybodol nad oedd i fod i yrru, ac roedd mor hy a darparu trwydded ffug. Yn amlwg nid oedd o’n meddwl fod y gwaharddiad yn berthnasol iddo fo.

“Mae gyrwyr sydd heb drwydded ac yswiriant yn beryglus i ddefnyddwyr ffordd eraill. Mae ystadegau yn dangos fod gyrwyr heb yswiriant yn fwy tebygol o fod mewn gwrthdrawiad, eu bod am adael gwrthdrawiad heb stopio a bod yn gysylltiedig â throseddau eraill. Mae’r effaith ar yrwyr cyfreithlon yn ddinistriol.

“Mae targedu gyrwyr sydd heb yswiriant yn rhan hanfodol o’n gwaith er mwyn diogelu pawb ar ffyrdd gogledd Cymru. Mae’r nifer sy’n meddwl ei fod o’n iawn i yrru’n anghyfreithlon yn siomedig ac mi fyddwn yn parhau gyda’n gwaith er mwyn targedu’r rhai sy’n gyrru’n anghyfreithlon. Mae torri rheolau’r ffyrdd yn creu risg ac mae’r ddedfryd yn dangos fod goblygiadau i’r rhai sy’n gwneud hynny.

“Rydym eisiau tawelu meddwl y cyhoedd ein bod yn parhau i gydweithio hefo’n partneriaid er mwyn dod a throseddwyr o flaen y llysoedd. Dwi’n mawr obeithio fod y ddedfryd hon yn atgoffa rhai bod y gyfraith yno am reswm.”