Adroddiad cenedlaethol HeForShe

Ddoe, lansiwyd y trydydd Adroddiad Cydraddoldeb Rhywedd mewn Plismona yn y DU blynyddol wrth gefnogi menter cydraddoldeb rhywedd y Cenhedloedd Unedig, HeForShe. 

Mae heddluoedd y DU i gyd wedi ymroi i HeForShe er mwyn gwella diffyg cydraddoldeb ar sail rhywedd ymysg lefelau uwch o fewn plismona. Maent hefyd wedi ymroi i atal cam-drin domestig a cham-drin rhywiol mewn cymdeithas. 

Mae'r mudiad HeForShe yn cael ei gefnogi gan fwy na dwy filiwn o bobl, gan gynnwys arweinwyr byd, penaethiaid gwladwriaethau a Phrif Swyddogion Gweithredol byd-eang ac enwogion.

Mae'r trydydd adroddiad yn dod â data a adroddir yn genedlaethol at ei gilydd gan ddangos y rhaniad rhwng rhywedd ymysg y rhengoedd uwch o fewn y gwasanaeth heddlu ynghyd â rhannu arfer gorau ledled heddluoedd yn y DU.

Yn yr adroddiad, gwnaeth heddluoedd y DU adrodd ar eu cynnydd. Maent yn cynnwys:

• Heddlu Gogledd Cymru yn cyflwyno cynllun mentora o chwith llwyddiannus sy'n gweld cydweithwyr o ardaloedd sy'n cael eu tangynrychioli yn cydweithio ag uwch reolwyr. Mae hyn er mwyn rhoi profiadau byw a safbwynt gwahanol, agor sgyrsiau ac amlygu rhwystrau a phroblemau. 
• Heddlu Swydd Hertford a wnaeth sefydlu gweminar siop barbwr er mwyn adfywio HeForShe a rhoi'r amser a'r lle i swyddogion a staff gwrywaidd gael trafodaeth onest ac agored ynghylch sut y gallent hyrwyddo HeForShe. Ar ddiwedd y sesiwn, cofrestrodd 10 o'r rhai gymerodd ran i fod yn Llysgenhadon.
• Heddlu Swydd Gaerlŷr yn gweithio ar wella eu demograffeg rhywedd yn y gweithle drwy gyflwyno sawl mesur ychwanegol er mwyn cynorthwyo gweithredu positif ar gyfer recriwtio swyddogion heddlu o grwpiau a dangynrychiolir, gan gynnwys ar sail rhywedd. Ar ddiwedd mis Awst 2021, roedd 46.9% o'u gweithlu yn ferched.
• Heddlu'r Met a wnaeth recriwtio Cynghreiriad HeForShe selog canolog er mwyn atgyfnerthu eu hymrwymiad i'r ymgyrch a neilltuo peth o'r gwaith gyda'u Rhwydwaith Merched. 
• Heddlu Swydd Northampton yn cyflwyno menter o'r enw "gweithredu positif tawel" sydd wedi bod yn arbennig o lwyddiannus ac yn cynnwys y meysydd ymyrraeth canlynol:

• Nodi unigolion cymwys
• Ymdriniaeth ragweithiol gan uwch arweinwyr
• Cymorth drwy'r broses tu hwnt

• Heddlu Norfolk yn penodi arweinydd tactegol ar gyfer HeForShe sydd wedi golygu bod gwaith a phrosiectau o ran cydraddoldeb wedi parhau'n ddwys a blaengar. Lansiwyd cynllun eiriolaeth gweithio hyblyg newydd hefyd er mwyn cynnig cymorth pwrpasol i'r rhai hynny sy'n chwilio am geisiadau a'u goruchwylwyr. 
• Heddlu Swydd Nottingham a wnaeth ymgymryd ag ymchwil er mwyn cael cipolwg i agweddau ac ymddygiadau o ran gweithgarwch corfforol a amlygodd dri phrif ataliwr. O ganlyniad i'r gwaith hwn, cynigiwyd sawl argymhelliad a oedd yn cynnwys:

• Prawf ffitrwydd i ferched yn unig
• Profion bîb tawel
• Lleihau gwylwyr
• Sesiynau galw mewn ymarfer

Gwelodd y rhaglen 71% o'r grŵp yn llwyddo yn y prawf ffitrwydd.

• Heddluoedd Surrey a Sussex yn cyflwyno "Rhaglen Datblygu PC/DC-Rhingylliaid a Staff yr Heddlu" sy'n canolbwyntio ar y darn hyder sydd wedi'i nodi. Maent yn defnyddio adnoddau dysgu a datblygu mewnol ynghyd ag uwch lefarwyr arweiniol benywaidd. Mae ganddynt hefyd ffocws cryf ar fentora a datblygu rhwydwaith.
• Heddluoedd yn canolbwyntio'n fewnol ar aflonyddu rhywiol a rhywiaeth yn y gweithle. Defnyddio profiadau go iawn i bwysleisio'r realiti ac effaith y problemau. Mae fideos yn cael eu defnyddio i ganolbwyntio ar amlygu'n union yr hyn ydy aflonyddu rhywiol a rhywiaeth yn y gweithle. Wrth symud ymlaen, bydd yn cynorthwyo'r dioddefwyr hynny i deimlo fel eu bod yn cael gwell cymorth a grym i ymdrin ag ymddygiadau amhriodol. 

Carl Foulkes, Prif Gwnstabl Heddlu Gogledd Cymru ydy Arweinydd HeForShe Plismona'r DU.  Dywedodd: “Mae'r flwyddyn ddiwethaf wedi gweld effaith ddigynsail ar blismona oherwydd Covid-19. Tra rydym mewn lle llawer gwell, mae'r pandemig yn parhau. Bu llofruddiaeth drasig Sarah Everard gan swyddog heddlu hefyd eleni. Yn sgil hyn, daeth sgyrsiau i'r amlwg ynghylch ymateb yr heddlu i drais yn erbyn merched a genethod (VAWG). Mae HeForShe yn creu cyswllt clir rhwng anghydraddoldebau rhywedd a thrais ar sail rhywedd. Bydd y gwaith sy'n cael ei wneud gan heddluoedd i ddileu hyn yn parhau."

"Mae Cyngor Cenedlaethol Prif Swyddogion Heddlu yn glir fod ymdrin â VAWG yn flaenoriaeth lwyr i blismona. Mae'n cydnabod tra bod llawer o waith yn parhau, mae llawer o waith sylweddol i'w wneud er mwyn sicrhau hyder mewn plismona a bod merched yn ddiogel yn ein cymunedau. Nid cyfrifoldeb plismona ydy hyn i gyd. Ond rydym yn chwarae rôl hanfodol mewn atal niwed a dod â throseddwyr o flaen eu gwell. Rydym yn dylanwadu'r hyn mae cymdeithas yn barod i'w ganiatáu fel ymddygiad derbyniol."

"Rwyf yn annog holl heddluoedd yn y DU i edrych dros yr adroddiad hwn. Mae hyn er mwyn gweld lle maent yn y data a dysgu o heddluoedd eraill ynghylch sut gellir gwneud gwelliannau. Mae camau mawr wedi'u cymryd i gynyddu'r nifer o ferched sy'n ymuno fel swyddogion heddlu. Ar ben hyn, rydym wedi gweld twf merched yn dod yn Brif Swyddogion. Fodd bynnag, mae'n bwysig rwan nad ydym yn colli ffocws. Mae angen i ni sicrhau fod y nifer cynyddol o ferched sydd wedi ymuno â phlismona drwy'r cynnydd yn teimlo eu bod yn cael eu cynnwys, eu cefnogi ac yn cael y cyfleoedd datblygu iawn. Mae hyn er mwyn ymdrin â'r bwlch o ferched sy'n cael eu tangynrychioli o fewn swyddi rheoli canol ac uwch.

"Edrychaf ymlaen at y flwyddyn i ddod, lle mae'r Cenhedloedd Unedig yn symud i'w hail gyfnod HeForShe. Bydd hyn yn caniatáu plismona yn y DU i ail-gadarnhau eu hymrwymiad a gosod amcanion ar gyfer y pum mlynedd nesaf. Mae angen i ni rŵan, yn fwy nag erioed, barhau'r momentwm a chyflymu newid tuag at gydraddoldeb o ran rhywedd."

Mae HeForShe yn fudiad sy'n ceisio ymgysylltu dynion a phobl o bob rhywedd i ymuno â merched er mwyn gweithio gyda'i gilydd i gyflawni cydraddoldeb gwirioneddol o ran rhywedd. Mae'n cael ei gefnogi gan fwy na dwy filiwn o bobl, gan gynnwys arweinwyr byd, penaethiaid gwladwriaethau a Phrif Swyddogion Gweithredol byd-eang ac enwogion. 

Gallwch ganfod mwy am HeForShe a gwneud eich ymrwymiad eich hun, gan ymuno â'r miloedd o swyddogion a staff sy'n gweithio gyda'i gilydd i gymell newid y byddwn ni gyd yn elwa ohono.

 

Adroddiad Cydraddoldeb HeForShe