Llysgenhadon Ifanc

Rhaglen Llysgenhadon Ifanc Gogledd Cymru

Mae pobl ifanc ar draws Gogledd Cymru yn cael eu hannog i sicrhau bod eu lleisiau'n cael eu clywed ar faterion plismona drwy wneud cais i ddod yn aelodau o Raglen Llysgenhadon Ifanc Heddlu Gogledd Cymru.

Yn dilyn llwyddiant y rhaglen y llynedd, mae Heddlu Gogledd Cymru unwaith eto yn awyddus recriwtio pobl ifanc rhwng 16 a 24 oed ac sydd i gyd yn byw yn yr ardal, i hysbysu a helpu'r heddlu ar faterion sy'n ymwneud â phobl ifanc a dweud eu dweud ar blismona a throseddu lle maen nhw'n byw.

Dywedodd PC Mel Cartledge-Davis, Swyddog Ymgysylltu ac Ymyriadau Ieuenctid Heddlu Gogledd Cymru: "'Da ni'n gobeithio recriwtio unigolion a fydd yn rhoi llais grymus i'w cyfoedion ar draws y rhanbarth, ac a fydd yn helpu, yn herio ac yn llywio'r gwaith 'da ni'n ei wneud a fydd yn helpu gwneud penderfyniadau gwell er mwyn diwallu anghenion pobl ifanc ledled Gogledd Cymru".

"Bydd cyfleoedd hyfforddi ynghylch magu hyder, gwaith tîm ac arweinyddiaeth. Bydd y llysgenhadon hefyd yn magu sgiliau a phrofiad gwerthfawr a fydd yn berthnasol ac y gellid eu defnyddio fel rhan o Fagloriaeth Cymru, fel rhan o'u CV neu helpu hefo ceisiadau addysg bellach neu addysg uwch.

"Byddan nhw'n cymryd rhan mewn craffu'r defnydd o rymoedd yr heddlu ynghyd â chwynion a digwyddiadau hefo pobl ifanc – rhoi adborth a gwneud argymhellion i Heddlu Gogledd Cymru.

Ychwanegodd PC Cartledge-Davis: "'Da ni'n awyddus gwneud yn siŵr fod y Rhaglen Llysgenhadon Ifanc yn cynnwys grŵp amrywiol o bobl ifanc sy'n adlewyrchu cyfansoddiad y boblogaeth leol, gan gynnwys y bobl hynny sydd hefo profiad uniongyrchol o'r heddlu a'r system gyfiawnder. Nid ydy cyswllt blaenorol hefo'r heddlu neu euogfarn yn rhwystr i ymgeisio."

Os oes gyno chi ddiddordeb ymgeisio, neu os 'da chi'n adnabod rhywun ifanc a fyddai'n hoffi cymryd rhan, ewch draw i ein dudalen recriwtio er mwyn cwblhau ffurflen gais.

Nodiadau:

• Y dyddiad cau ar gyfer ceisiadau ydy hanner dydd ar ddydd Gwener 11 Hydref 2024.
• Nid yw dedfryd blaenorol yn golygu na ddylid ymgeisio. Nid yw’r rôl yma angen gwiriadau fetio/DBS.