Safonau'r Gymraeg
Cyfres o ofynion cyfreithiol rhwymol ydy Safonau’r Gymraeg sy’n ceisio gwella’r gwasanaethau dwyieithog y gall y cyhoedd yng Ngogledd Cymru eu disgwyl gan Heddlu Gogledd Cymru.
Mae’r Safonau’n nodi beth ydy ein cyfrifoldebau o ran darparu gwasanaethau a gwybodaeth ddwyieithog i’r cyhoedd ac i’r staff mewn sefyllfaoedd penodol, gan sicrhau nad ydy’r Gymraeg yn cael ei thrin yn llai ffafriol na’r Saesneg. Mae’r Safonau’n cynnig cyfle i atgyfnerthu a gwella ein darpariaeth ddwyieithog.
Gweler y lawrlwythiadau isod.
Gwneud Cwyn
Os ydych yn teimlo nad ydym wedi cydymffurfio â Safonau’r Iaith Gymraeg sy’n berthnasol i Heddlu Gogledd Cymru, yna ewch at ein adran cwynion.
Deddf yr Iaith Gymraeg 1993 a’r Mesur Iaith Gymraeg (Cymru) 2011
Mae Deddf yr Iaith Gymraeg 1993 wedi cael effaith sylweddol ar y ffordd y mae cyrff cyhoeddus a chyrff y Goron yn darparu gwasanaethau i’r cyhoedd yng Nghymru. Mae hyn yn cynnwys yr holl heddluoedd a’r Sector Cyfiawnder yng Nghymru. Mae’n dilyn cyfnod o dros 400 o flynyddoedd yn ein hanes pan mai Saesneg oedd yr unig iaith weinyddol. Ers 1993 mae’n ddyletswydd arnom i gynhyrchu Cynllun Iaith Gymraeg sy’n egluro mewn manylder sut ydym yn trin y Gymraeg a’r Saesneg yn gydradd. Mae hyn yn cynnwys sicrhau bod gennym y sgiliau a’r gallu angenrheidiol i gynnig gwir ddewis iaith i’r cyhoedd.
Erbyn hyn mae gennym ddeddfwriaeth Iaith Gymraeg manylach. Cafodd y Mesur Iaith Gymraeg Gydsyniad Brenhinol yn gynnar yn 2011. Mae'r ddeddf newydd hon yn cadarnhau statws swyddogol y Gymraeg yng Nghymru ochr yn ochr â'r iaith Saesneg. Yn ogystal â chyflwyno nifer o ‘Safonau’ iaith Gymraeg mae hefyd yn cyflwyno rôl Comisiynydd Iaith Gymraeg fydd â phwerau gweithredu cryf er mwyn diogelu hawliau siaradwyr Cymraeg i gael mynediad at wasanaethau drwy gyfrwng y Gymraeg.
O safbwynt ymateb i ofynion y ddeddfwriaeth hon mae’r Heddlu yn gallu dangos ei ymrwymiad ei hun ar ffurf ein Cynllun Iaith Gymraeg er mwyn rhoi statws cyfartal i’r ddwy iaith ac i weithio tuag at fod yn sefydliad dwyieithog.