Prif Gwnstabl Cynorthwyol Gareth Evans

Dechreuodd Gareth ei yrfa yn Heddlu Dyfnaint a Chernyw ym 1998, cyn trosglwyddo i Ogledd Cymru fel cwnstabl ymateb yn 2000. Ers hynny, mae wedi gwasanaethu ym mron i bob rheng mewn lifrai ac fel ditectif ar draws rhanbarthau’r Gorllewin a Chanolog ac yng Ngwasanaethau Trosedd, gan orffen yno fel Pennaeth Uned Amddiffyn y Bregus a Phennaeth Gwasanaethau Trosedd.

Fel Uwch Swyddog Archwilio PIP 3 a PIP 4, mae wedi arwain nifer o archwiliadau cymhleth, yn enwedig ym meysydd diogelu’r cyhoedd a cham-drin plant. Yn 2016, mi raddiodd o Academi Genedlaethol yr FBI, yn Quantico yn yr Unol Daleithiau, ar ôl tri mis o astudio strategaeth archwilio troseddau treisiol, trafodaethau argyfyngau a rheolaeth y cyfryngau, gan gynnwys ymweliadau ag adrannau heddlu Philadelphia ac Efrog Newydd.

Yn ei swydd bresennol fel Prif Gwnstabl Cynorthwyol Dros Dro, mae ganddo gyfrifoldeb dros Drosedd a Phlismona Lleol, ac mae’n Bennaeth Strategol Drylliau Tân ac yn Bennaeth Aur dros yr heddlu.