Blacmel rhywiol

‘Blacmel rhywiol’ yw’r enw byr ar ‘cribddeiliaeth rywiol â chymhelliant ariannol’. Mae’n fath o flacmel ar-lein lle mae troseddwyr yn bygwth rhannu lluniau, fideos, neu wybodaeth rhywiol amdanoch chi. Efallai eu bod yn ceisio cymryd arian oddi wrthych neu eich gorfodi i wneud rhywbeth arall nad ydych eisiau ei wneud.

Gall unrhyw un fod yn ddioddefwr blacmel rhywiol. Fodd bynnag, pobl ifanc rhwng 15 a 17 oed, ac oedolion o dan 30 oed sydd mewn mwyaf o berygl yn aml.

Sut i adnabod blacmel rhywiol

Gall blacmel rhywiol gael ei gyflawni gan unigolion, ond mae gangiau troseddau cyfundrefnol y tu ôl iddo fel arfer.

Mae troseddwyr yn aml yn targedu pobl trwy apiau detio, cyfryngau cymdeithasol, gwe-gamerâu, neu wefannau pornograffi. Efallai y byddant yn defnyddio hunaniaeth ffug i fod yn ffrind i chi ar-lein. Os yw person rydych newydd gyfarfod ag ef/hi ar-lein yn sgwrsio â chi mewn ffordd rywiol, neu’n gofyn am ddelweddau rhywiol, gallai fod yn ymgais i gyflawni blacmel rhywiol.

Dylech fod yn wyliadwrus os yw rhywun rydych wedi cwrdd â nhw ar-lein:

• yn ceisio dechrau perthynas â chi yn gyflym iawn (efallai y byddant hyd yn oed yn anfon delwedd rywiol atoch chi yn gyntaf)
• wedi anfon ceisiadau ffrind at lawer o bobl, nid dim ond chi
• yn gofyn dro ar ôl tro i chi wneud pethau rhywiol nad ydych chi’n gyfforddus yn eu gwneud
• yn dweud wrthych eu bod wedi hacio eich cyfrif neu wedi cael gafael ar eich cysylltiadau

Gall ymdrechion i gyflawni blacmel rhywiol ddigwydd yn gyflym iawn, neu gallant ddigwydd dros gyfnod hir. Ni ddylech fyth rannu delweddau rhywiol neu wybodaeth amdanoch chi’ch hun os nad ydych yn gyfforddus yn gwneud hynny.

Awgrymiadau ar gyfer amddiffyn eich hun

Os ydych yn sgwrsio â phobl newydd ar-lein:

• Adolygwch eich gosodiadau preifatrwydd. Mae troseddwyr yn llai tebygol o’ch targedu os na allant weld pwy yw eich ffrindiau a’ch teulu.
• Os nad ydych yn gyfforddus yn siarad â’r person neu os bydd rhywun nad ydych yn ei adnabod yn cysylltu â chi, gorffennwch y sgwrs yn gyflym.
• Os oes gennych unrhyw amheuon am y person neu os ydych yn poeni eich bod yn cael eich targedu, riportiwch hynny. Fel arall, gweler ‘Dolenni defnyddiol’ ymhellach i lawr y dudalen hon am ragor o gyngor ar gadw’n ddiogel. Mae hyn yn cynnwys gwybod sut i riportio neu dynnu delweddau oddi ar y we.

Beth i’w wneud os ydych wedi cael eich targedu

Os ydych yn ddioddefwr blacmel rhywiol, nid eich bai chi ydyw. Mae cymorth a chefnogaeth ar gael.

• Peidiwch â mynd i banig, mae cymorth a chefnogaeth ar gael.
• Stopiwch bob ffurf ar gyfathrebu â’r troseddwr ar unwaith.
• Peidiwch â thalu, hyd yn oed os cewch eich temtio i wneud hynny, gan nad oes sicrwydd y bydd hyn yn atal y bygythiadau.
• Cadwch y dystiolaeth:
  
  • gwnewch nodyn o enwau defnyddiwr, cyfeiriadau e-bost, rhifau ffôn a rhifau cyfrif banc
• Casglwch ddolenni url i ble mae eich delweddau neu wybodaeth yn cael eu rhannu ar-lein.

Mae gan y rhan fwyaf o wefannau cyfryngau cymdeithasol reolau yn erbyn rhannu cynnwys personol heb ganiatâd. Dylech allu cael gwared ar y deunydd.

Os ydych chi wedi talu’r person, ystyriwch ddweud wrth eich banc. Efallai na fydd yn gallu cael unrhyw arian yn ôl ond mae’n ein helpu ni a’r banciau i wybod ei fod wedi digwydd.

Ei riportio

Rydym yn deall y gallai fod yn anodd rhoi gwybod i ni am y math yma o drosedd. Rydym yma i wrando a’ch cefnogi mewn unrhyw ffordd y gallwn.

Gallwch roi gwybod i ni am gamddefnydd delweddau personol:

• ar-lein
• drwy ffonio 101
• os oes gennych nam ar eich clyw neu’ch lleferydd, defnyddiwch ein gwasanaeth ffôn testun ar 18001 101
• os ydych o dan 18 oed, gallwch riportio rhyw flacmel rhywiol, neu unrhyw fath arall o gam-drin plant yn rhywiol ar-lein, wrth Ganolfan Ddiogelwch Camfanteisio ar Blant a’u Hamddiffyn Ar-lein (CEOP) yr Asiantaeth Troseddu Cenedlaethol

Dolenni defnyddiol

Oedolion

Mae Revenge Porn Online yn rhoi cymorth cyfrinachol am ddim i ddioddefwyr sy’n byw yn y DU.

Offeryn am ddim yw Stop NCII (Cam-ddefnyddio Delweddau Personol Anghydsyniol) i helpu i ganfod a dileu delweddau rhag cael eu rhannu ar-lein.

Mae’r Samariaid yn wasanaeth gwrando cyfrinachol am ddim ar gyfer unrhyw fater.

Mae Get safe online yn darparu gwybodaeth ffeithiol a hawdd ei deall am ddiogelwch ar-lein.

Plant a phobl ifanc

Mae Report Remove yn eich galluogi i adrodd yn gyfrinachol am ddelweddau a fideos rhywiol ohonoch chi’ch hun a’u tynnu oddi ar y rhyngrwyd.

Mae Childline yn rhoi cymorth cyfrinachol am ddim i bobl ifanc dan 19 oed.

Elusen iechyd meddwl yw Young Minds ar gyfer plant a phobl ifanc sydd  â chymorth negeseuon testun 24 awr y dydd, saith diwrnod yr wythnos.

Mae Adran Addysg Camfanteisio ar Blant a’u Hamddiffyn Ar-lein (CEOP) yn rhoi cyngor i rieni, plant a phobl ifanc ar gadw’n ddiogel rhag cam-drin rhywiol a meithrin perthynas amhriodol ar-lein.

Cymorth arall

Gall y Ganolfan Seiberddiogelwch Genedlaethol (NCSC) helpu os ydych wedi bod yn ddioddefwr gwe-rwydo neu hacio, neu os oes angen cyngor arnoch ar ddiogelu eich data ar-lein.

Gall Action Fraud – Romance Fraud helpu os ydych yn meddwl bod partner y gwnaethoch gwrdd ag ef/hi ar-lein yn ceisio cael arian gennych ond nad yw’n eich bygwth nac yn eich cribddeilio. Gelwir hyn yn ‘dwyll rhamant’.