Ffugiadau dwfn: Riportio i’r heddlu
Cynnwys:
| 1. Ynglŷn â ffugiadau dwfn |
| 2. Beth allwch chi ei wneud |
| 3. Riportio’r peth i'r heddlu |
| 4. Cymorth a chefnogaeth |
Rydyn ni’n deall y gallai'r hyn sydd wedi digwydd fod yn annifyr ichi neu efallai na fyddwch chi’n siŵr a ydy hyn yn rhywbeth y gallwch chi sôn wrthon ni amdano.
Dyma rai enghreifftiau o bethau y gallwch eu riportio i'r heddlu a sut.
Cam-drin delweddau personol neu "bornograffi dial"
Mae'n anghyfreithlon rhannu neu fygwth rhannu lluniau neu fideos personol o rywun heb eu cydsyniad nhw ac mae hyn yn cynnwys delweddau ffug.
Os yw'n ymddangos bod y llun neu’r fideo ffug yn real ac yn debyg iawn i chi neu rywun rydych chi'n ei nabod gall hyn fod yn drosedd.
Gallwch riportio hyn i'r heddlu ar-lein.
Deunydd sy’n ymwneud â cham-drin plant yn rhywiol
Mae'n anghyfreithlon gwneud, rhannu a meddu ar ffotograffau anweddus a ffug-ffotograffau a/neu fideos, gan gynnwys ffugiadau dwfn, o rywun sydd dan 18 oed.
Does dim ots a yw'r person sy’n cael ei ddangos yn real ynteu wedi’i greu drwy ddefnyddio AI.
Troseddau casineb
Mae'n anghyfreithlon i rywun weithredu mewn ffordd sy'n fygythiol ac wedi'i bwriadu i ysgogi casineb trwy negeseuon, lluniau a fideos.
Gallai hyn fod yn ddelwedd neu fideo sy'n cynnwys negeseuon sy'n galw am drais yn erbyn person neu grŵp penodol, neu ddelweddau a/neu fideos sy'n dangos trais yn erbyn rhywun.
Gallwch riportio hyn i'r heddlu ar-lein.
Twyll
Mae defnyddio ffugiad dwfn i dwyllo, neu geisio twyllo, rhywun i drosglwyddo arian neu unrhyw beth arall yn dwyll.
Gallwch riportio hyn i Action Fraud, sef canolfan riportio genedlaethol y Deyrnas Unedig ar gyfer twyll a seiberdroseddu.
Cyfathrebiadau ffug
Gall ffugiadau dwfn gael eu defnyddio i anfon negeseuon ffug, er enghraifft yn eich dangos chi neu rywun rydych chi'n ei nabod yn gwneud rhywbeth sydd heb ddigwydd mewn gwirionedd.
Os yw hyn yn cael ei wneud gan rywun sydd am achosi niwed, naill ai'n emosiynol neu'n gorfforol, gall fod yn anghyfreithlon.
Gallwch riportio hyn i'r heddlu ar-lein.
Gweithgareddau terfysgol
Os yw'r ffugiad dwfn yn hybu, yn gogoneddu neu'n helpu i gyflawni gweithredoedd terfysgol ac eithafiaeth dreisgar, dylech riportio hyn i'r heddlu.
Os byddwch chi'n dod ar draws cynnwys rydych chi'n credu ei fod yn derfysgol ei natur, riportiwch hyn yn ddienw yn www.gov.uk/report-terrorism neu drwy lawrlwytho'r ap iREPORTit ar siop apiau naill ai Apple neu Android.
Stelcio ac aflonyddu
Os oes rhywun yn gwneud rhywbeth dro ar ôl tro (gan gynnwys defnyddio ffugiadau dwfn) sy'n gwneud ichi deimlo'n ofnus, yn ofidus, dan fygythiad neu'n anniogel, yna gallwch ei riportio.
Gallwch riportio hyn i'r heddlu ar-lein.
Blacmel
Os oes ffugiad dwfn yn cael ei ddefnyddio i’ch blacmelio chi neu rywun rydych chi'n ei nabod, mae hyn yn drosedd.
Gallwch riportio hyn i'r heddlu ar-lein.