Gyrru a defnyddio dyfais symudol
Mae'n anghyfreithlon defnyddio ffôn symudol i’w ddal yn y llaw wrth yrru cerbyd modur ar y ffyrdd yn y Deyrnas Unedig.
Gall hyd yn oed defnyddio dewis dim dwylo gael ei gosbi os bernir eich bod yn gyrru'n beryglus.
Mae gan yr heddlu hawl i'ch stopio os ydyn nhw'n meddwl bod rhywbeth yn tynnu’ch sylw ac nad ydych chi’n rheoli’ch cerbyd, a gallwch gael eich erlyn.
Mae’n dal yn anghyfreithlon defnyddio’ch dyfais symudol â llaw os ydych:
- wedi stopio wrth oleuadau traffig
- yn ciwio mewn traffig
- yn goruchwylio gyrrwr sy’n dysgu
- yn gyrru car sy’n diffodd yr injan pan fyddwch yn stopio symud
- yn dal a defnyddio dyfais sydd all-lein neu yn y modd hedfan wrth yrru’ch car
Gallwch ddefnyddio ffôn a llaw:
- pan eich bod wedi parcio’n ddiogel a’ch injan wedi’i diffodd
- pan fo angen i chi ffonio 999 neu 112 mewn argyfwng a’i bod yn anniogel neu’n anymarferol i stopio
- pan fyddwch yn gwneud taliad digyswllt mewn cerbyd sydd ddim yn symud, er enghraifft mewn bwyty gyrru drwodd
- pan fyddwch yn defnyddio’r ddyfais i barcio’ch cerbyd o bell
Defnyddio eich dyfais symudol heb ddwylo
Gallwch ddefnyddio dyfeisiau symudol dim-dwylo wrth yrru eich car cyn belled nad ydych yn eu dal ar unrhyw adeg tra’n eu defnyddio. Ni ddylai’r ddyfais eich rhwystro rhag gweld y ffordd a’r traffig o’ch blaen.
Cosbau
Gallwch gael chwe phwynt cosb ar eich trwydded a dirwy o £200 os byddwch yn defnyddio ffôn llaw wrth yrru.
Os cewch chwe phwynt o fewn dwy flynedd ar ôl ichi basio'ch prawf, byddwch yn colli’ch trwydded.
Gallwch gael tri phwynt cosb os nad oes gennych olygfa lawn dros y ffordd a'r traffig sydd o'ch blaen, neu reolaeth briodol dros y cerbyd.
Gall fod rhaid ichi fynd i'r llys hefyd, lle gallwch chi:
- gael eich gwahardd rhag gyrru neu reidio
- cael dirwy uchaf o £1,000 (£2,500 os ydych chi'n gyrru lorri neu fws)
Bydd pwyntiau ar eich trwydded yn arwain at gostau yswiriant uwch.