Action Fraud
Os ydych chi wedi dioddef sgam, twyll neu drosedd ar-lein (seiberdrosedd) gallwch riportio’r peth i Action Fraud:
- ar-lein
- ar 0300 123 2040 (dydd Llun i ddydd Gwener 8am i 8pm).
Action Fraud yw'r ganolfan riportio genedlaethol ar gyfer twyll a seiberdroseddau. Mae'n casglu adroddiadau am dwyll ar ran heddluoedd Cymru, Lloegr a Gogledd Iwerddon. Yn achos twyll yn yr Alban, riportiwch y peth yn uniongyrchol i Heddlu'r Alban.
Cofrestru gydag Action Fraud
Gallwch riportio fel gwestai, heb gofrestru a heb greu cyfrif.
Ond rydyn ni’n argymell y dylech chi greu cyfrif yn gyntaf, achos wedyn fe allwch chi:
- cadw adroddiad nad ydych chi wedi'i orffen, a dod yn ôl ato
- gweld diweddariadau ar yr hyn sydd wedi digwydd i'ch adroddiad
- ychwanegu gwybodaeth at eich adroddiad
- ffonio Action Fraud i drafod eich adroddiad
- cael diweddariadau drwy’r ebost
Yr hyn y gallwch ei riportio i Action Fraud
Gallwch riportio sgamiau, twyll a throseddau ar-lein (seiberdroseddau) i Action Fraud, ond fe ddylech chi riportio:
- twyll treth busnes neu dreth bersonol i CThEM (Cyllid a Thollau Ei Fawrhydi)
- sgamiau sy’n ymwneud â CThEM yn uniongyrchol iddyn nhw
- twyll budd-daliadau ar GOV.UK
- twyll mewnfudo i'r Swyddfa Gartref
- arian ffug i'r heddlu
- meddyginiaeth neu ddyfeisiau meddygol ffug i'r Asiantaeth Rheoleiddio Meddyginiaethau a Chynhyrchion Gofal Iechyd (MHRA)
- cam-drin plant ar-lein neu ymddygiad ar-lein amheus sy'n cynnwys plentyn i'ch heddlu lleol neu i'r Ganolfan Camfanteisio ar Blant a’u Hamddiffyn Ar-lein
- bwlïo neu droseddau casineb ar-lein i'r heddlu
I riportio un o'r rhain dilynwch y dolenni uchod.
Beth sy'n digwydd ar ôl ichi riportio rhywbeth i Action Fraud
Ar ôl i chi riportio rhywbeth i Action Fraud, bydd eich adroddiad yn cael ei anfon at y Swyddfa Gwybodaeth Twyll Genedlaethol (NFIB), sy'n rhan o heddlu Dinas Llundain. Byddan nhw’n penderfynu beth i'w wneud nesaf.
Os bydd yr NFIB yn penderfynu y gall fod digon o wybodaeth yn eich adroddiad i'r heddlu ymchwilio iddo, byddant yn ei anfon at yr heddlu lleol lle digwyddodd y drosedd. Bydd yr heddlu hwnnw'n edrych ar yr wybodaeth ac yn penderfynu a ddylen nhw ymchwilio i'r achos. Dylen nhw ddweud wrthoch chi beth maen nhw'n mynd i'w wneud.
P'un a fydd yr NFIB yn penderfynu anfon eich adroddiad ymlaen at yr heddlu lleol i ymchwilio ai peidio, fe gewch chi wybod beth mae'r NFIB wedi'i wneud o fewn 28 diwrnod ar ôl ichi riportio’r peth (neu pryd bynnag yr anfonoch chi ddiweddariad ddiwethaf).
Fe allai'r NFIB gymryd camau eraill hefyd, er enghraifft dileu gwefannau neu rifau ffôn sy’n cael eu defnyddio i gyflawni twyll.
Sicrhau diweddariad am eich adroddiad
Er mwyn gallu cael yr wybodaeth ddiweddaraf ynglŷn â’ch adroddiad, mae angen ichi gofrestru gydag Action Fraud cyn ichi riportio. Yna gallwch
ddilyn cynnydd eich adroddiad drwy fewngofnodi i'ch cyfrif.
Ar ôl mewngofnodi, i wirio statws eich adroddiad, cliciwch 'My account’ yn y gornel dde uchaf ac yna cliciwch 'My reports'.
Unwaith y bydd achos wedi'i drosglwyddo i heddlu lleol, nhw sy’n gyfrifol am roi'r wybodaeth ddiweddaraf ichi.
Opsiynau eraill os ydych wedi cael eich sgamio neu’ch twyllo (iawndal sifil)
Os bydd yr heddlu'n penderfynu peidio ag ymchwilio i'ch achos fel trosedd, efallai y byddwch yn dal yn gallu cael iawndal neu arian yn ôl drwy ddod ag achos sifil eich hun.
Siaradwch â chyfreithiwr neu asiant adennill asedau i gael rhagor o wybodaeth.